काठमाडौं – गत वर्ष मंसिरमा सम्पन्न निर्वाचनमा नेकपा गठबन्धनले भारी बहुमत पाएपनि सत्ता हस्तान्तरणमा भएको ढिलाइप्रति प्रधानमन्त्री केपी शर्मा ओलीले आक्रोश पोखेका छन् ।

आफू नेतृत्वको सरकारले एक वर्ष पूरा गरेको अवसरमा बिहीवार देशवासीको नाममा गरेको सम्बोधनको शुरूमा ओलीले प्रमुख प्रतिपक्षी दल नेपाली कांग्रेसप्रति आक्रोश पोखे ।

‘आमनिर्वाचन सकिएको ३ महिना बितेको थियो । जनमतले ‘तिम्रो मिति पुग्यो’ भनेकाहरू अझैं सरकारमै थिए । झण्डै दुईतिहाइ जनमतसहित शासनको बागडोर सम्हाल्न तयार रहेको मेरो नेतृत्वको गठबन्धनलाई वैध सत्ता हस्तान्तरण गर्न त्यो पक्ष आनाकानी गरिरहेको थियो,’ ओलीले भने, ‘३ महिनादेखि कानूनका नौवटै सिङले हाम्रो लोकतन्त्रलाई बारम्बार उधिनिरहेको थियो । आमजनमत ‘अब त अति भयो’ भन्ने तहमा थियो । जिम्मा लिने पक्ष तयार थियो । तर छोड्नुपर्नेमा भने ‘यो के अनर्थ भयो’ भनेजस्तो विष्मयकारी मनस्थिति कायमै थियो ।’ 

जनमतलाई तत्कालीन शेरबहादुर देउवा सरकारले अटेर गरेको आरोपसहित ओलीले सम्बोधनमा भने, ‘यहीँ स्थितिलाई संकेत गर्दै मैले भनेको थिएँ – अनर्थ हैन, यो नयाँ जनमत हो । यो त आयो । आयो है भन्ने बुझ्नुस् र त्यही अनुरुपको बानी बसाल्नुस् ।’