काठमाडौं–प्रधानमन्त्री केपी ओलीले भारत प्रशासित कास्मिरमा ४० सुरक्षाकर्मीको ज्यान जाने गरी भएको आतंकवादी आक्रमणको भत्र्सना गरेका छन् । ओलीले बिहीबार साँझ भारतीय समकक्षी नरेन्द्र मोदीलाई टेलिफोन गरी आक्रमणको भत्र्सना गर्दै मृतक सुरक्षाकर्मीलाई श्रद्धाञ्जली र घाइतेको स्वास्थ्यलाभको कामना गरेका छन् ।

बिहीबार दिउँसो कास्मिरको पुलवालामा जैस–ए–मोहम्मद नामको आतंकवादी समूहले तीन सय ५० भन्दा बढी विस्फोटक पदार्थले भरिएको गाडी भारतीय सुरक्षाकर्मीको गुडिरहेको गाडीमा ठोक्काउँदा ४० जनाको ज्यान गएको थियो ।

जम्मुकास्मिरबाट श्रीनगरतर्फ गइरहेको सेन्ट्रल रिजर्भ पुलिस फोर्स (सिआरपिएफ) माथि आक्रमण भएको हो । आफ्ना सदस्य आदिल अहमदले आत्मघाती विस्फोट गराएको समूहका प्रवक्ता मुहम्मद हसानले पुष्टि गरेका छन् । आक्रमणमा घाइते भएका सुरक्षाकर्मीको स्थानीय अस्पतालहरूमा उपचार भइरहेको छ ।