काठमाडौं – माछापुच्छ्रे बैंक लिमिटेडले चितवन, तनहुँ, लमजुङ, बागलुङ र काठमाडौंमा ५ शाखारहित बैंकिङ सेवा एकैपटक सञ्चालनमा ल्याएको छ ।

बैंकले चितवनको इच्छाकामना गाउँपालिका (मुग्लिङ्ग) स्थित फिस्लिङ, तनहँुको म्याग्दी गाउँपालिकास्थित तार्पु, लमजुङको मध्य नेपाल नगरपालिकास्थित दुईपिप्ले, बागलुङको काठेखोला गाउँपालिकास्थित रेशा र काठमाडौंको कीर्तिपुर नगरपालिकास्थित भत्केपाटी, पिपलबोटमा शाखारहित बैंकिङ सेवा सञ्चालनमा ल्याएको छ ।

बैंकिङ पहुँचदेखि टाढा रहेका ग्रामीण भेगमा बैंकले आफ्ना ग्राहक सेवा केन्द्रमार्फत् अत्याधुनिक बैंकिङ सेवा पुर्याइरहेको छ । माछापुच्छ्रे बैंक लिमिटेडको हालसम्म ६१ शाखारहित बैंकिङ सेवा सुचारु भइसकेको बैंकले जनाएको छ ।

ग्राहक सेवा केन्द्रको रुपमा सञ्चालित शाखारहित सेवा केन्द्रबाट खाता खोल्ने, रकम जम्मा गर्ने र झिक्ने, रेमिटेन्स भुक्तानी, साथै कर्जा आवेदन गर्ने समेत व्यवस्था गरेको छ ।

बैंकले नेपालमै पहिलो पटक तुरुन्त (रियल टाइममा) खाता खोल्ने व्यवस्था गरेको छ भने चिपमा आधारित डेबिट कार्ड पनि तुरुन्त उपलब्ध गराएको छ ।

बैंकले पूर्वमा झापादेखि पश्चिममा कञ्चनपुर साथै हिमालदेखि पहाड र तराईसम्म आफ्ना ९३ वटा शाखा लगायत ६१ शाखारहित बैंकिङ सेवा गरी जम्मा १५४ स्थानबाट ग्राहकमा सम्पूर्ण बैंकिङ सुविधा प्रदान गरिरहेको छ । बैंकको देशभर १ सय १४ वटा एटीएम सञ्चालनमा छन् ।