काठमाडौं — स्कूल वा पढाइबाट हैरान भएर घरबाट भाग्ने बच्चाहरू त देखिएकै हो तर स्कूलको पीरले आत्महत्याको कुरा गर्ने बालकको कथाले चाहिँ मुटु नै हल्लाउँछ । 

बेलायतको एक विद्यालयमा सात वर्षका एक बालकले स्कूलमा लगातार पिटाइ खानुपरेकाले आफ्ना शिक्षकलाई सुसाइड नोट थमाए । 

जेक विल्किन्सन नामक यी बालकलाई उसकै क्लासका सहपाठीहरूले चिढ्याउने गर्थे । केही समयपछि त उनीहरूले उसलाई पिट्न पनि थाले । यसले गर्दा बालकलाई गहिरो आघात भयो र उनी आत्महत्याका बारेमा सोच्न थाले । 

उनले आफ्ना शिक्षकलाई एक सुसाइड नोट दिए जसमा लेखिएको थियो, ‘हे भगवान्, मलाई लग्नुस् ।’

घर गएर पनि उनले आफ्नो सिरानीमा त्यस्तै कुरा लेखे । उनले लेखे, ‘म बाँच्न चाहन्नँ ।’

जेककी आमा क्रिस्टीले बताइन्, ‘मलाई याद छ, त्यो दिन जेक एकदमै रोइरहेको थियो । उसको शरीरमा पिटाइको निशान थियो । उसको काँधमा पनि खत देखिन्थ्यो । म त्यो देखेर रोएँ ।’

घटनापछि जेकको आत्मविश्वास बढाउनका लागि क्रिस्टीले निकै मेहनत गरिन् । अहिले जेकको मानसिक स्थिति ठीक छ । उसलाई चित्र कोर्न एकदमै रुचि छ र त्यो उसका लागि स्ट्रेस बूस्टरको जस्तो काम गरिरहेको छ ।

एजेन्सी