काठमाडौं — जम्मु कश्मीरको पुलवामामा भएको आतंकवादी आक्रमणपछि पाकिस्तानको बचाउ हुने गरी बयान दिएका नवजोत सिंह सिद्धूलाई द कपिल शर्मा शोबाट निकालिएको खबर आएको थियो । 

शोका प्रशंसकहरूले सामाजिक सञ्जालमा अभियान चलाएपछि उनलाई निकालिएको भनिएको थियो । 

तर पूर्व क्रिकेटर तथा पञ्जाबका मन्त्री सिद्धूले शोबाट निस्किने अन्य कारण बताएका छन् । 

एक कुराकानीमा सिद्धूले भने, ‘म आफ्ना राजनीतिक दायित्वका कारण शोका केही भाग शूट गर्न असमर्थ रहें । मैले विधानसभाको कारवाहीमा भाग लिनुपर्ने भएकाले शूटिङमा भाग लिन सकिनँ । त्यसैले शो बनाउनेहरूले दुई

एपिसोडका लागि मेरो ठाउँमा अर्कालाई ल्याए । मलाई शोबाट हटाइएको विषयमा च्यानलले टर्मिनेसन लेटर दिएको छैन ।’

पुलवामा आक्रमणपछि भारतभरि आक्रोशको लहर फैलिँदा सिद्धूले भने पाकिस्तानप्रति नरम दृष्टिकोण अपनाउने किसिमको बयान दिएका थिए । त्यसपछि उनको चर्को आलोचना भयो र उनलाई शोबाट निकाल्नका लागि आवाज उठ्न थाल्यो ।

एजेन्सी