काठमाडौं- डा. गोविन्द केसीले मेडिकल शिक्षा र स्वास्थ्य क्षेत्र सस्तो र गुणस्तरीय हुनुपर्ने माग राख्दै १७ औं अनशनको चेतावनी दिएका छन् ।

बुधवार डा. केसीले एक विज्ञप्ति जारी गर्दै १५ औं अनशन तोड्दा सरकारसँग भएका सहमति कार्यान्वयन गर्न माग गरेको छ । उनले सरकारले सहमति विपरीत अघि बढेमा आफू जुनसुकै बेला अनशन बस्न सक्ने चेतावनी दिए ।

‘प्रबुद्ध नागरिकहरूको आग्रहमा हामीले १६ औं अनशनका कार्यक्रम केही समयलाई स्थगित गरेका थियौं । चिकित्सा शिक्षा विधेयकमा हामीसँग १५ औं सत्याग्रहको बेला भएको सम्झौताअनुसार नै अगाडि बढ्न चाहन्छौं । साथै १५ औं अनशन सत्याग्रहमा सहमति गरिएका अन्य माग पनि अबिलम्ब कार्यान्वयन गर्न माग गर्दछौं,’ विज्ञप्तिमा भनिएको छ, ‘अन्थया, सहमति विपरीत अघि बढेमा जुनसुकै समयमा आमरण अनशनसहितको सत्याग्रह शुरू चेतावनी दिन चाहन्छौं ।‘

डा. केसीले संसदमा दर्ता भएको शान्ति सुरक्षा विधेयक र सामाजिक सञ्जालसम्बन्धी विधेयकमाथि आफ्नो आपत्ति रहेको बताएका छन् ।

‘नागरिकले देशमा व्याप्त दण्डहीनता, कुशासनविरुद्ध लगायतका विभिन्न विषयमा सडक र सामाजिक सञ्जालबाट सम्बन्धित निकायलाई जिम्मेवारी बनाउँदै आइरहेका छन् । हाल संसदमा दर्ता भएको विधेयकले नागरिकलाई कुनै पनि स्थानमा स्वतन्त्र भेला हुन बाट वञ्चित गर्नुका साथै वाक स्वतन्त्रताबाट समेत वञ्चित हुने देखिन्छ,’ विज्ञप्तिमा उल्लेख छ, ‘जनताले तिरेको करबाट तलब भत्ता खाएर नागरिकको अधिकार खोसेर निरंकुश बन्न खोजिँदै छ ।’ उनले नागरिकको अधिकार कुण्ठित गर्ने विधेयक कदापी स्वीकार्य नहुने बताएका छन् ।