विराटनगर- विराटनगर विमानस्थलमा पार्किङको नाममा बढी रकम लिइएको समाचारपछि त्यबारेमा विमानस्थलले ठेकेदार कम्पनीलाई स्पष्टीकरण सोधेको छ ।

लोकान्तरमा विमानस्थलको बाहिरी पार्किङमा ठेकेदारको मनपरी भन्ने समाचार प्रकाशित गरेको थियो । समाचारलाई लिएर कार्यालयका प्रमुख टेकनाथ सिटौलाले मोटरसाइकलको पार्किङमा ५ रुपैयाँभन्दा बढी तिर्नु नपर्ने बताउँदै यदि त्यस्तो पाइए ठेकेदारलाई कारवाही गर्ने बताउँदै आएका थिए ।

फागुन ४ गते समाचार प्रकाशितपछि ठेकेदार कम्पनीलाई बोलाएर प्रमुख सिटौलाले बढी रकम लिएको बारेमा स्पष्टीकरण सोधेका थिए । ठेकेदार कम्पनी अत्रि कन्ष्ट्रक्सन एण्ड सप्लायर्स प्रा.लिले त्यहाँ पार्किङमा आएका सवारीबाट बढी रकम लिने गरेको स्वीकार गरेपछि ठेकेदार कम्पनीलाई बढी रकम लिनुको कारणसहित स्पष्टीकरण सोधिएको प्रमुख सिटौलाले जानकारी दिए ।

लोकान्तरका प्रदेश प्रतिनिधिलाई टेलिफोन गरी प्रमुख सिटौलाले ठेकेदारले गल्ती भएको र आइन्दा गल्ती नगर्ने र अहिले बनाइएको रसिद हटाउन तथा नयाँ रसिद छपाउन लिखित रुपमा भनिएको जानकारी दिए । त्यसको भोलिपल्टै फागुन ७ गतेदेखि ठेकेदार कम्पनीले पार्किङ घटाउनुको साथै नयाँ रसिदसमेत छपाएर काम गर्न थालेको छ ।

विमानस्थल बाहिर पार्किङमा राखिएको साइकल, मोटरसाइकल तथा कारहरूलाई बढी रकम लिएपछि त्यसको विरोध भएको थियो । तर ठेकेदारले बेवास्ता गर्दै आएको थियो । फागुन १ गतेदेखि नयाँ ठेकेदार आएपछि ५ रुपैयाँको मोटरसाइकल पार्किङ शुल्कबाट बढाएर १० देखि २० रुपैयाँसम्म ठेकेदारले लिँदै आएको थियो ।