विराटनगर– एक नम्बर प्रदेशस्तरीय कराँते प्रतियोगिताको उपाधि मोरङले चुमेको छ । आठौं राष्ट्रिय कराँते प्रतियोगिताका लागि विराटनगरमा भएको प्रतियोगितामा ६ स्वर्ण, दुई रजत र दुई कास्य पदक जितेर मोरङले प्रतियोगिताको उपाधि चुमेको हो । 

मोरङ जिल्ला सितोरियो कराँते संघ र पुर्वाञ्चल क्षेत्रिय खेलकुद विकास समितिको आयोजनामा विराटनगरको  शहीद रंगशाला कभर्डहलमा  भएको तीन दिने  प्रदेश स्तरीय कराँते प्रतियोगितामा पाँच स्वर्ण, तीन रजत, चार कास्य प्राप्त गर्दै खोटाङ दोस्रो तथा तीन स्वर्ण तीन रजत र चार कास्य पदक जित्दै सुनसरी तेस्रो भयो ।  

पुरुष एकल कातामा मोरङका बिनय लिम्बु, ५० केजी तौल समुह पुरुष कुमितेमा महेश यादव, ५५ केजी तौल समूहमा विवेक थापा, ६० केजी तौल समुहमा किशोर कोइराला, ६७ केजी तौल समुहमा रोजन खड्का र ८४ प्लसमा सागर राउतले स्वर्ण पदक जिते । ७५ केजी तौल पुरुष कुमितेमा सल बहादुर गुरुङ र महिला एकलकातामा स्वस्तिका राईले रजत तथा ६० केजी तौल समुह महिला कुमितेमा रोजिना लिम्बु र ६८ प्लस कुमितेमा कृति दुलाले कास्य पदक जितेकी छन् ।

यस्तै, खोटाङकी रोश्मा राई, विद्याकला राई, नन्जु राईले महिला समूहकाता र एकल महिलाकातामा रोश्मा राईले स्वर्ण पदक जितिन् । ४५ केजी तौल समूह महिला कुमितेमा डुनु राई, ६८ केजी तौल समूहमा जस्मिना राई र ६८ प्लसमा मिसडोना राइले स्वर्ण पदक जितिन् । 

समूह पुरुषकाता सहित ६० केजी तौल समूह पुरुष कुमितेमा सन्तोष राई, ५५ केजी तौल समूह महिला कुमितेमा विद्याकला राईले रजत पदक दिलाएकी थिइन् । पुरुष एकलकातामा मोतिचन्द्र राई, ६७ केजी पुरुष कुमितेमा रुरीहाङ राई, ७५ केजीमा सुजन राई, ८४ प्लस कुमितेमा इश्वरधन राईले कास्य पदक जितेका छन् ।