काठमाडौं — भारतीय समाजमा एक प्रेमी जोडीका लागि खुलमखुला प्रेम गर्न वा सम्बन्धमा रहन सहज छैन । लिभइन रिलेसनशिपमा बस्ने जोडीलाई अपराधीको नजरले हेरिन्छ । 

यसको परिणामस्वरूप लिभइनमा बस्ने जोडीले लुकीलुकी प्रेम गर्नुको विकल्प छैन । मनमा सधैं डरको भाव रहनु, घरपरिवारको त्रास, धर्मका ठेकेदारहरूको धम्कीका बीच खुला हावामा सास लिन नै सहज हुँदैन । 

फिल्म लुका छिपीका दुवै पात्र गुड्डु (कार्तिक आर्यन) र रश्मी (कृति सेनन) पनि लुकीलुकी प्रेम गर्छन् । त्यसैले फिल्मको टाइटल नै लुका छुपी राखिएको हो । 

फिल्ममा लिभ इन सम्बन्धमा बसेको एक जोडीप्रति समाजको कस्तो दृष्टिकोण छ भनी देखाइएको छ । सम्बन्ध भनेको एक सम्झौता हैन अनि प्रेम र विवाह दुई फरक कुरा हुन् र बिहेअघि लिभ इनमा बस्नु किन सही हो भन्ने कुरा फिल्ममा बुझाउने कोशिश गरिएको छ । 

फिल्मको कथा गुड्डु माथुरवरिपरि घुमेको छ । उनी मथुरामा एक टेलिभिजन रिपोर्टर हुन् । गुड्डु रश्मी (कृति सेनन) नामक एक युवतीको प्रेममा पर्छन् । रश्मी बाहुबली नेता त्रिवेदीजी (विनय पाठक) की छोरी हुन् । त्रिवेदी कट्टर हिन्दूवादी नेता हुन् र प्राचीन विचारधारा राख्छन् । उनको नजरमा लिभइनमा बस्ने मानिस सबैभन्दा खराब हुन् । 

त्रिवेदीजीकी छोरी रश्मी गुड्डुलाई माया त गर्छिन् तर बिहे गर्न चाहँदिनन् । आफूले पूरै जिन्दगी बिताउनुपर्ने मानिसका बारेमा उनी राम्रोसँग बुझ्न चाहन्छिन् । बुवाको क्रोधका बारेमा थाहा पाएपनि उनी आफ्नो जीवनको सम्झौता गर्न चाहँदिनन् र लिभ इनमा बस्न चाहन्छिन् । 

तर गुड्डुलाई बिहेको हतारो छ । आफ्ना परिवारका मानिस र रश्मीका पिताको डरले उनी लिभ इनमा बस्न चाहँदैनन् । गुड्डु र रश्मीले लिभ इनमा बस्दा के कस्तो समस्या बेहोर्नुपर्छ भनी फिल्ममा रमाइलो तरिकाले देखाइएको छ । फिल्ममा पंकज त्रिपाठीले रमाइलो भूमिका निर्वाह गरेका छन् । 

फिल्मको कथा प्रभावशाली छैन तर त्यसलाई रमाइलो तरिकाले प्रस्तुत गरिएको छ । फिल्ममा रोचक पात्रहरूलाई पेश गरिएको तरिकाले शुरूदेखि अन्त्यसम्म हसाइरहन्छ । 

कार्तिक र कृतिको अभिनय राम्रो छ । कतिले फिल्ममा बुद्धिमान् महिलाको भूमिका निर्वाह गरेकी छन् र आफ्नो जीवनका फैसला सोचविचार गरेर मात्र लिन्छिन् । 

कार्तिक चाहिँ हरेक कुरामा हतार गर्छन् । फिल्ममा दुवैजनाले बिहेका लागि गरेको संघर्ष रोचक छ । गम्भीर विषयलाई कमिक तरिकाले देखाइएकाले दर्शकलाई पूर्ण मनोरञ्जन प्राप्त हुन्छ । 

तर यति हुँदाहुँदै पनि कार्तिक र कृतिको केमेस्ट्री खासै जमेको देखिँदैन । कमेडीको ओधरडोजमा उनीहरूबीचको प्रेम दबिएको छ । 

लुका छुपीलाई रोमान्टिक कमेडी फिल्म भन्दा पनि कमेडी रोमान्टिक फिल्म भन्नुपर्छ । 

आजतकमा प्रकाशित पुनीत उपाध्यायको समीक्षा