काठमाडौं– शनिबार राति निधन भएका नेपाल कम्युनिस्ट पार्टी (नेकपा)का नेता तथा पूर्व उपप्रधानमन्त्री भरतमोहन अधिकारीको पार्थिव शरीर नेकपाको केन्द्रीय पार्टी कार्यालय धुम्बाराहीमा राखिएको छ । अन्तिम श्रद्धाञ्जलिकालागि उनको पार्थिव शरीर आइतबार बिहान पार्टी कार्यालय ल्याइएको हो ।

श्रद्धाञ्जलिका लागि मध्याह्न १२ बजेसम्म उनलाई पार्टी कार्यालयमा राखिने नेकपाका कार्यालय सचिव कृष्णगोपाल श्रेष्ठले जानकारी दिए । अधिकारीलाई श्रद्धाञ्जलि दिन नेकपाका शीर्ष नेता, सरकारका मन्त्री, राजनीतिक दलका नेता तथा कार्यकर्ताका साथै सर्वसाधारणको पार्टी कार्यालयमा भिड लागेको छ । 

श्रद्धाञ्जलिपछि शवयात्रासहित पशुपति आर्यघाटमा अधिकारीको अन्त्येष्टि गरिने सचिव श्रेष्ठले जानकारी दिए । पूर्वअर्थमन्त्री समेत रहेका अधिकारीको ८२ वर्षको उमेरमा शनिबार राति निधन भएको हो । फोक्सो र मुटुको समस्याले तीन सातादेखि धूम्रबाराहीस्थित ह्याम्स अस्पतालमा उपचाररत नेता अधिकारीको राति ९ः३५ बजे निधन भएको अस्पतालका मेडिकल डारेक्टर डा भाष्करराज पन्तले विज्ञप्तिमार्फत जानकारी गराएका हुन् ।

तत्कालिन नेकपा (एमाले)का अध्यक्ष मनमोहन अधिकारीले नेतृत्व गरेको सरकारमा अर्थमन्त्री रहँदा उनले ज्येष्ठ नागरिकलाई सामाजिक सुरक्षा भत्ता र आफ्नो गाउँ आफँै बनाऔँजस्ता लोकप्रिय कार्यक्रम ल्याएका थिए । चारपटक सांसद बनेका अधिकारीले भौतिक योजना तथा निर्माण र कानून तथा न्याय मन्त्रालय पनि सम्हालेका थिए ।