बुटवल- अर्धभूमिगत राजनीति गरिरहेको नेकपाका महासचिव नेत्रविक्रम चन्द विप्लवको गृहनगर कपिलवस्तुको शिवराज नगरपालिकामा प्रहरीले सर्च अभियान चलाएको छ ।

विप्लवको पार्टीले देशभर चलाएको हिंसात्मक गतिविधि नियन्त्रणको प्रयास स्वरूप प्रहरी उनकै गाउँमा खोजतलासमा जुटेको हो ।

यसक्रममा गएराति शिवराज नगरपालिका वडा नं ९ अञ्चलपुर बस्ने वर्ष ३९ का दुर्गाबहादुर रोकालाई प्रहरीले हातियार सहित पक्राउ गरेको छ । प्रहरीका अनुसार उनी विप्लवको पार्टीमा आवद्ध छन् ।

त्यसक्रममा रोकाको घरमा खनतलासी गर्दा एसएमजी बन्दुक दुई नाल त्यसमा लाग्ने म्याग्जिन ३ थान र ६८ राउन्ड गोली, चाइनिज पेस्तोल १ नाल तथा म्याग्जिन र ३ राउन्ड गोली, एम- 16 को १२९ राउन्ड गोली, वाइरिङ तार त रिमोर्टसमेत बरामद गरिएको प्रहरीले जनाएको छ ।

उक्त गाउँमा अझै हतियार रहेको आशंकामा प्रहरीले भगवानपुरका शिक्षक यादव चन्दको घरमा छापा मार्न प्रयास गरेको थियो । तर स्थानीयले प्रतिरोध गरे । बालमैत्री स्थानीय शासन वडा घोषणा भएको भन्दै बालबालिकाहरूले प्रहरीलाई गाउँ प्रवेशमा रोक लगाए ।

बालबालिका र स्थानीयवासीको अवरोधपछि नेपाल प्रहरी र शसस्त्र प्रहरीका १ सय ६८ जवान गाउँबाट करीब एक किलोमिटर पछाडि हट्न बाध्य भए ।

प्रहरीले भगवानपुरको ५ घरमा खनतलासी गरेको वडा प्रहरी कार्यालय चन्द्रौटाका प्रमुख महेश्वर उपाध्यले बताए ।

प्रहरी अझै भगवानपुर नजिकै रहेको सुन्दरीडाँडा चौकी आसपासमा तैनाथ छ ।