काठमाडौं – सप्ताहान्तमा धेरै सुत्दा स्वास्थ्यमा हानि हुने एक अध्ययनले देखाएको छ । हप्ताभरि मेहनत गर्ने अनि यसक्रममा निद्रा मार्ने र सप्ताहान्त आउनेबित्तिकै दिनभरि सुत्ने मानिसको स्वास्थ्य बिग्रने देखिएको हो । 

सप्ताहान्तको दिनभरि सुत्दा थकान त हट्छ तर स्वास्थ्य पनि खराब हुन्छ । 

करेन्ट बायोलोजी जर्नलमा प्रकाशित अध्ययन निष्कर्षअनुसार, सप्ताहान्तमा धेर आराम गर्दा समेत तपाईंले गुमेको निद्राको भरपाई गर्न सक्नुहुन्न । सप्ताहान्तमा सुत्दा थोरै समयका लागि मात्र राम्रो अनुभव हुन्छ र फेरि थकाइ लाग्न थाल्छ । 

अध्ययनमा संलग्न डा. गोल्डस्टीनका अनुसार, लामो समयसम्म नसुत्दा शरीरका हर्मोनहरूमा असर पर्छ । राति ९ बजेपछि शरीरमा मेलाटोनिन नामक हर्मोन निस्कन्छ जसले गर्दा हामीलाई निद्रा लाग्छ । बिहान सबेरै यो हर्मोन निस्कन बन्द हुन्छ । तर राति ढिलोसम्म जाग्दा शरीरको आफ्नो रिदम बिग्रन्छ । 

यस्तो दिनचर्या हुँदा तपाईंलाई राति ढिलोसम्म निद्रा लाग्दैन र बिहान पनि छिट्टै निद्रा भंग हुन्छ । हप्ताभरि कम सुत्ने मानिसमा क्यान्सरको समस्या बढिरहेको र समयअगावै मृत्यु हुने खतरा रहेको गोल्डस्टीनको भनाइ छ । 

कम सुत्ने मानिसलाई राति केही न केही खान मन लाग्ने दाबी पनि अध्ययनले गरेको छ । तर पूरा निद्रा लिने व्यक्तिमा यो समस्या आउँदैन र उनीहरू स्वस्थ रहन्छन् । 

अन्य अध्ययनहरूले समेत एक घन्टाको निद्रा खराब हुँदा पनि भोलिपल्ट २०० क्यालोरी बढी खाइने दाबी गरेका छन् । 

सप्ताहान्तमा धेर सुत्नुभन्दा दिनदिनै ससानो निद्रा लिँदा स्वास्थ्य राम्रो हुने र कार्यक्षमता बढ्ने देखिएको छ ।

एजेन्सी