विराटनगर– आजदेखि शुरु हुने साफ महिला च्याम्पियनसिपमा खेल्ने नेपाली महिला फुटबल टोलीका खेलाडीलाई जनही एक एक लाख रूपैयाँ वितरण गरिएको छ । अखिल नेपाल फुटबल संघ (एन्फा)ले पहिलो पटक ओलम्पिक छनोट खेलमा भारत, बंगलादेश र म्यानमारसँग बराबरी खेलेर छनोटको दोस्रो चरणमा प्रवेश गराएकोले प्रति खेलाडी ५० हजार र हिरो कपमा विजेता बनेका कारण थप ५० हजार रूपैयाँ गरी एक लाख रूपैयाँका दरले पुरस्कार वितरण गरिएको एन्फा प्रवक्ता किरण राईले बताए ।

खेलाडीहरूलाई विराटनगर महानगरपालिकाका मेयर भीम पराजुलीले नगद हस्तान्तरण गरेका हुन् । यस्तै उनले साफ महिला च्याम्पियनसिपमा खेल्ने टोलीमा सहभागी मोरङका तीन खेलाडीहरू सरू लिम्बू (पथरी), मनमाया लिम्बू (लेटाङ) र कविता धिमाल (उर्लाबारी)लाई सद्भावना दुत नियुक्त गरेका छन् । 

मेयर पराजुलीले नेपाली महिला फुटबल टीम जुनसुकै प्रतियोगीतामा पनि सक्षम रहेको दाबी गर्दै पुरुष टोलीसँग पनि भीड्न सक्ने बताए । विराटनगर महानगरपालिकाले छोरी बचाउ अभियान सञ्चालन गरिरहेको जानकारी दिँदै उनले नेपाली टोलीले च्याम्पियनसिप जितेमा महानगरले टोलीका सबै खेलाडीहरूलाई थप नगद पुरस्कार दिने घोषणासमेत गरे । 

उक्त कार्यक्रममा एन्फाका अध्यक्ष कर्माछिरिङ शेर्पाले महिला फुटबलमा नेपाली खेलाडीहरूले उल्लेखनीय प्रगति गरेको बताए । उनले यो प्रतियोगीता महिला फुटबल टोलीका लागि देशलाई अझ चिनाउनका लागि राम्रो अवसर भएको जानकारी दिए । अध्यक्ष शेर्पाले नेपाली महिला टोलीले उच्च मनोबलका साथ खेल प्रस्तुत गर्न सक्षम रहेको दाबी गरे ।