जनकपुरधाम –धनुषाको सबैला नगरपालिका वडा नम्बर ६ का ६५ वर्षीय चौठी यादव अहिले जनकपुरधामको घर–घरमा पुगेर पूर्वराजा ज्ञानेन्द्र शाहको जनकपुर भ्रमणको प्रचार–प्रसार गर्न व्यस्त छन् । ज्ञानेन्द्र शाह धार्मिक भ्रमणको सन्दर्भ पारेर आज (बुधवार) ४ बजे जनकपुरधाम आउने कार्यक्रम छ ।

ज्ञानेन्द्रको स्वागतमा खटिएका चौठीको हुलिया पनि दर्शनीय छ । छातीमा पूर्व राजदम्पतीको तस्वीर अंकित ब्याच लगाएका छन् भने ज्ञानेन्द्रको तस्वीर, केही सन्देश र राजभक्त त्यागी चौठी यादव परिचय अंकित प्लेकार्ड बोकेका छन् ।

‘म जनकपुरमा पसलदेखि घर–घरमा पुगेर पूर्व राजाको जनकपुर भ्रमणबारे बताइरहेको छु,’ यादवले लोकान्तरसँग भने, ‘मलाई उहाँका स्वकीय सचिव सागर तिमिल्सिनाले फोन गरेर भ्रमणबारे जानकारी गराउनुभएको छ ।’

आफू पहिलेदेखि नै राजसंस्थाको अनुयायी भएको उनले बताए । माओवादी जनयुद्धका समयमा राजाको जन्मदिन मनाएकै निहुँमा तत्कालीन माओवादीले आफूलाई कालो मोसो दलेको स्मरण समेत उनी गर्छन् ।

उनले पूर्व राजाको जन्मदिन मनाउन अझै छाडेका छैनन् । ‘उहाँको तस्वीर राखेर जन्म दिवस मनाउने गरेको छु । मिठाइ ल्याएर समाजका मानिसलाई बाँड्ने पनि गर्छु,’ उनले भने ।

उनले ज्ञानेन्द्रलाई ११ पटक भेटिसकेका छन् ।

पूर्वराजा सिमरादेखि धरानसम्म आउँदा पनि पुग्ने गरेका उनले भने, ‘भेटमा चौठी यादव धैर्य धारण गर्नुस् भनेर राजाले भन्नुहुन्छ,’ यादवले भने, ‘हामीले क्रान्ति गर्ने होइन, जनताको मन जित्ने हो ।’

ज्ञानेन्द्रले सबैलाई धैर्य धारण गर्नका लागि आग्रह गर्ने गरेको उनले बताए ।

‘जनतासँग भेटवार्ता हुँदा जनताले सुरक्षा नभएको, शान्ति नभएको, विकास नभएको, भ्रष्टाचार बढेको भन्दै उहाँसँग गुनासो राख्ने गर्छन्,’ यादवले भने, ‘अनि राजाले जनतालाई धैर्य राख्न भन्नुहुन्छ ।’

पूर्वराजाको जनकपुर भ्रमण फागुन २२ गतेका लागि नै तय भएको थियो । तर पूर्व बडा महारानी रत्न शाहको स्वास्थ्य स्थिति बिग्रिएपछि भ्रमण सारिएको ज्ञानेन्द्रका स्वकीय सचिव सागर तिमिल्सिनाले जानकारी दिए ।

ज्ञानेन्द्र विमानबाट अपराह्न ४ बजे जनकपुर आइपुग्ने कार्यक्रम छ । राजसंस्था विघटन भएको लामो समयपछि पहिलोपटक जनकपुरधाम आउँदा उनले नागरिक अभिनन्दन सभालाई सम्बोधन गरेका थिए । 

उनी भोलि सर्लाहीको मलंगवा जाने कार्यक्रम रहेको छ । मलंगवामा प्रसिद्ध दुर्गा मन्दिरमा पूजा पाठ गर्ने कार्यक्रम तय भएको छ । चैत्र १ गते जनकपुरधामको जानकी मन्दिरमा पूजापाठ गर्ने कार्यक्रम रहेको छ ।

चैत्र २ गते उदयपुरको गाईघाटमा राधाकृष्ण मन्दिरमा पूजा पाठ गर्ने कार्यक्रम रहेको छ । चैत्र ३ गते सप्तरीको सखडा भगवती मन्दिरको दर्शन गर्ने कार्यक्रम रहेको छ ।

धार्मिक भ्रमणमा आउन लागेका ज्ञानेन्द्रले जनकपुरधामस्थित सीताशरण होटलमा महत्त्वपूर्ण भेटघाट समेत गर्नेछन् ।