सुर्खेत- लोपोन्मुख राउटे समुदायका पाँच जना राउटेले बुधवार तलब बुझेका छन् । राउटे बालबालिकामा कुपोषण बढ्दै गएको बताउँदै सामाजिक सेवा केन्द्र सोसेकले उनीहरूलाई खानपान व्यवस्थापन गर्न भन्दै नियुक्ति गरेको थियो । उनीहरू नियुक्त भएको एक महिना पुगेको छ ।

राउटेका महामुखिया महिन बहादुर शाहीले चेक बुझेर पहिलो पटक बैंकबाट पैसा लिएको बताए । ‘यो कागज (चेक)को पनि काम हुने रहेछ ।’ उनले भने, ‘आज त मज्जा आइगो । बैंकले मलाई दुई हजार रुपैयाँ दियो ।’

अर्का राउटे मुखिया सुर्यनारायण शाही पनि प्रफुल्ल थिए । ‘यसअघि हामीले केही पनि काम गरेका थिएनौं,’ उनले भने, ‘अब हामी काम गर्न शुरू गर्छौं ।’

एईआएन र सामाजिक सेवा केन्द्र (सोसेक) नेपाल दैलेखको साझेदारीमा सञ्चालित राउटे परियोजनाबाट उनीहरूलाई रोजगारी प्रदान गरिएको थियो । समुदायका महामुखिया महिनबहादुर शाही, मुखियाहरू सुर्यनारायण शाही, दिलबहादुर शाही र वीरबहादुर शाही तथा राउटे युवा प्रकाश शाहीलाई जागिर दिइएको थियो ।

के गर्छन् राउटेले ?

राउटे सामाजिक कार्यकर्ताहरूको विभिन्न जिम्मेवारीहरू तोकिएको छ । उनीहरूले समुदायमा बालबालिकालाई औषधि खुवाउन र व्यक्तिगत सरसफाईमा लाग्न उत्प्रेरित गराउनेछन् । समुदायमा राउटे परियोजनामार्फत् यस अघिदेखि नै तीन जना कर्मचारी कार्यरत छन् । परियोजनामार्फत खटिएका कर्मचारीहरूलाई बाल क्लव, महिला समूह र युवा समूह गठन गर्न सहयोग तथा सहजीकरण गर्ने, जोखिम तथा कुपोषित राउटे बालबालिकालाई पोषणयुक्त लिटो खुवाउन सहयोग गर्ने सोसेकका अध्यक्ष हीरासिंह थापाले जानकारी दिए । 

थापाका अनुसार राउटे नागरिक बिरामी परेका र चोटपटक लागेका राउटे समुदायलाई उपचार गर्न सहयोग तथा सहजीकरण गर्ने, राउटे समुदाय बसेको सामुदायिक वन संरक्षणको लागि सकेसम्म थोरै क्षति हुने गरी आफ्नो सिपको प्रयोग गरि सामाग्री निर्माण गर्न सहजीकरण गर्नेछन् ।