विप्लवका लागि वार्ताको ढोका खुला : मन्त्री पण्डित

फागुन ३०, २०७५

जनकपुर– नेत्रविक्रम चन्द ‘विप्लव’ नेतृत्वको नेकपाका लागि वार्ताको ढोका खुला रहेको सरकारले जनाएको छ । जनकपुरमा बिहीबार भएको पत्रकार सम्मेलनमा संघीय मामिला तथा सामान्य प्रशासन मन्त्री लालबाबु पण्डितले सरकारले वार्ताको ढोका बन्द नगरेको स्पष्ट पारे । 

सरकारले उच्चस्तरीय वार्ता समिति बनाए पटकपटक वार्ताका लागि आह्वान गर्दा पनि विप्लव समूहले वार्ता गर्न नचाहेको उनले बताए । मन्त्री पण्डितले वार्ताका लागि पटकपटक पत्र काटे पनि उनहरू नआएको बताए । उनले भने, ‘म वार्ता पनि आउदिन, आफ्नो कुरा पनि राख्दिन, संविधान पनि मान्दिन भन्ने छुट कसैलाई छैन ।’


ADVERTISEMENT

आफूलाई राजनीतिक पार्टी भन्ने तर, गतिविधि भने संविधान, लोकतन्त्र र कानूनविरित गर्नेलाई सरकारले नियन्त्रण गर्ने उनले बताए । तर, सरकारले वार्ताका लागि ढोका खुला राखेको उनको भनाइ छ । तराईमा भूमिगत रहेका अन्य समूहलाई पनि सरकारले वार्ताको लागि आह्वान गरेको तर उनीहरु वार्तामा आउन नचाहेका कारण सरकारले नियन्त्रणमा  लिने मन्त्री पण्डितले स्पष्ट पारे ।

सीके राउतलाई कुनै पद दिइएको छैन
मन्त्री पण्डितले सीके राउतलाई कुनै पद दिएर सरकारले सम्झौता नगरेको स्पष्ट पारे । उनलाई राष्ट्रिय सभाको सदस्य बनाउने हल्ला चलिरहेका बेला मन्त्री पण्डितले यस्तो बताएका हुन् । उनले देशको अखण्डता र संविधानलाई मानेर सम्झौता गरेको स्पष्ट पारे । मन्त्री पण्डितले जनमत संग्रहका लागि सम्झौता नभएको बताए । उनले भने, राउतले संविधान मान्ने र चुनावमार्फत राजनीतिक मुलधारमा आउने प्रतिबद्धता जनाएका हुन् । अब राउतले जनकपुरमा गरेको गतिविधि फेरि दोहोराए भने सरकारले नियन्त्रण गर्छ ।’

मन्त्री पण्डितले देशमा राजनीतिक समस्या समाधान भएको दाबी गरे । अब देश समृद्धिको दिशामा अघि बढेको उनको भनाइ छ ।  

कर्मचारी समायोजन
मन्त्री पण्डितले कर्मचारी समायोजनको प्रक्रिया जारी रहेको जानकारी गराए । १ लाख  ४० हजारको दरबन्दी रहेकोमा ३२ लाख कर्मचारी अझै अपुग रहेको उनले बताए । ६० हजार कर्मचारी समायोजन भइसकेको उनले बताए । मन्त्री पण्डितले स्वास्थ्य सेवा बाहेका अन्य क्षेत्रमा कर्मचारी समायोजन सकिएको जानकारी गराए । यो प्रक्रिया १५ दिनभित्रमा सकिने उनको भनाइछ ।

उनले असारसम्म सबै समस्या समाधान हुने बताए । लोकसेवा आयोगले चैत्र दोस्रो सातासम्ममा आवेदन खुला गर्ने उनले बताए ।

फागुन ३०, २०७५ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस