काठमाडौं– प्रमुख प्रतिपक्षी नेपाली कांग्रेसको केन्द्रीय कार्यसमिति बैठक सोमबार बस्दैछ । बैठक पार्टी केन्द्रीय कार्यालय सानेपामा बिहान ११ बजे बस्न लागेको हो । पार्टीको अनुशासन र निर्वाचन समिति गठनलगायत विषयमा निर्णय गर्न बैठक बोलाइएको हो । 

बैठकमा पार्टीको विधानअनुसार नियमावली निर्माण, सरकारका कामकारवाही, समसामयिक राजनीतिलगायत विषयमा पनि छलफल हुने कांग्रेसले जनाएको छ । यसअघि गत फागुन १४ गते बोलाइएको बैठक सभापति शेरबहादुर देउवा, वरिष्ठ नेता रामचन्द्र पौडेल  र नेता कृष्णप्रसाद सिटौला पक्षबीच अनुशासन र निर्वाचन समिति गठनका विषयमा सहमति हुन नसक्दा बैठक बस्दै नबसी स्थगित भएको थियो ।

सहमतिका लागि थप छलफल आवश्यक रहेको भन्दै बैठक स्थगन गरिएको जनाएको थियो । केन्द्रीय समिति बैठक बस्नुअघि दुवै पक्षबीच पदाधिकारीस्तरमा समिति गठन सम्बन्धमा सहमतिको प्रयास गरिने बताइएको छ । समिति गठनमा दुवै पक्षले आफू अनुकूल खोज्दा सहमतिमा ढिलाइ भएको छ ।