जनकपुरधाम– स्वतन्त्र मधेश गठबन्धनका संयोजक डा.सीके राउतसँग संयुक्त राष्ट्र संघका प्रतिनिधिले गोप्य भेटघाट गरेका छन् । सिरहाको लहानस्थित मारवाडी सेवा सदनमा राष्ट्रिय परिषद्को बैठक चलिरहँदा यूएनको गाडीमा सवार व्यक्तिले राउत संग गोप्य भेटघाट गरेका छन् । 

आइतवार साँझ ७ बजेतिर यूएनको गाडी मारवाडी सेवा सदनमा प्रवेश गरेको लोकान्तरले फेला पारेको हो । स्रोतका अनुसार युएनको उक्त गाडी गठबन्धनको बैठक बस्नुअघि देखि नै त्यहाँ रहेको थियो ।  बैठक जारी नै रहेको अवस्थामा आज सोमबार उक्त गाडी बिहान ७ बजे तिर बाहिर निस्की बजार तर्फ लागेको छ ।

आइतवारदेखि जारी बैठक जारी छ । अति नै गोप्य भनिएको उक्त बैठकमा युएनको गाडी पहिले देखि हुनु र त्यसका प्रतिनिधिले राउत संग गोप्य भेटघाट गर्नुले ठूलो आशंका उत्पन्न भएको छ ।

 
अति गोप्य बैठक 
फागुन ३ गते आइतवार गठबन्धनको बैठक बिहान १० बजे शुरु भएको थियो । बैठकमा सहभागी हुने नेता तथा कार्यकर्ताहरुको नाम रोल अनुसार नागरिकताको प्रमाणपत्र चेकजाँच गरेर मात्र प्रवेश गर्न दिइएको थियो । राउतको आफ्नो आन्तरिक अभिलेख सहितको रोलमा नाम नभएका १५ जनालाई गेटबाटै फिर्ता पठाइएको थियो ।

प्रवेश गर्ने बेला सहभागीहरुको शरीर खान तलासी गर्नुका साथै मोबाइल र डटपेन समेत राउतको सुरक्षा दस्ताले नियन्त्रणमा लिएको थियो । शुरुमा ३० जना कार्यकर्ता उपस्थित भएका थिए । तर, पछी आफैंमा पनि आन्तरिक बिबाद हुन सक्ने भएपछी करीब करीब १ सय २५ जना सम्मको सहभागीलाई बैठकमा संलग्न गराईएको छ । 

बैठकमा राउत संगै सह संयोजक कैलाश महतो, प्रवक्ता अब्दुल खान सहित शिर्ष नेताहरु ड्यासमा बसेका छन् । सहभागीहरुलाई मारवाडी सेवा सदनभन्दा बाहिर आउन दिइएको छैन । सहभागीहरुको मोबाइल अफ रहेको छ । बैठकमा सभागी हुनका लागि राउत आइतवार बिहान ६ बजे भारतीय गाडीबाट निस्केका थिए ।

अन्य ४ जना सहयोगीलाई लिएर बीआर ३२ पीए ५१०५ नम्बरको भारतीय नम्बर प्लेट गाडीमा पुगेका थिए । राउत लहानमा साढे सात बजे तिर पुगेका थिए । १० बजे बैठक शुरु भए पछि दीप प्रज्वलन गरेर उदघाटन गरिएको थियो । गठबन्धनका राम मनोहर यादवको तस्वीरमा माल्यार्पण गर्दै श्रद्धान्जलि समेत दिइएको थियो । श्रद्धान्जलि दिँदा राउतले पहिले नै बनाएको मधेश गानको धुन बजेको थियो । 

पन्चकन्याले मधेशको गाथा गाईएको स्वागत गान गाएको थियो । कार्यक्रममा राष्ट्रीय गान कुनै पनि बेला बजेको थिएन । केही संचार माध्यममा राउतको बैठकमा राष्ट्रीय गान बजेको भन्ने समाचार प्रकाशन भएको थियो ।

मधेशका २० वटा जिल्लाका प्रतिनिधिहरुलाई संलग्न गराएर नेपाल सरकार संग गठबन्धनका संयोजक राउतले गरेको ११ बुंदे सम्झौता र आगामी रणनिती बारे बैठक चलिरहेको छ । बैठक आज सोमबार सकिने बताईएको छ ।

यूएनका प्रतिनिधिको प्रतिक्रिया : सीके राउतको कार्यक्रमस्थलमा गाडी देखिनु संयोग मात्र !