काठमाडौं – राष्ट्रियसभा सदस्य दिलकुमारी रावल थापा ‘पार्वती’ले आगलागीका घटना हुँदा क्षति कम गर्न हरेक स्थानीय तह अर्थात् पालिकामा दमकलको व्यवस्था गर्न माग गरेकी छन् ।

राष्ट्रियसभा बैठकमा बोल्दै सांसद पार्वतीले जनघनत्व बढिरहेका शहरी क्षेत्रमा समेत दमकल नहुँदा क्षति बढी हुने गरेको बताइन् ।

केही दिनयता खोटाङ, उदयपुरको चुरे जंगलमा, ओखलढुंगा, चितवन राष्ट्रिय निकुञ्ज लगायत क्षेत्रमा भएको आगलागीका घटनाप्रति ध्यानाकर्षण गराउँदै सांसद पार्वतीले सरकारी तयारीबारे जिज्ञासा राखेकी छन् ।

‘जनधनको क्षति कम गर्न, क्षति हुन नदिन, प्रकोपको पूर्वतयारीबारे सरकारको तयारी के छ ?’ उनले सोधिन्, ‘राहात र उद्दारका कार्य प्रभावकारी बनाउन कस्तो तयारी छ ?’

प्रकोपको प्रभावकारी व्यवस्थापनका लागि भएका पहलबारे सरकारका तर्फबाट जानकारी गराउन समेत उनले माग गरिन् ।