क्राइस्टचर्च आक्रमणपछि प्रधानमन्त्री आर्डर्नको व्यवहारको चौतर्फी प्रशंसा

चैत ४, २०७५

काठमाडौं – न्युजील्यान्डको क्राइस्टचर्चका दुईवटा मस्जिदमा शुक्रवार भएका आतंकवादी आक्रमणले संसारलाई नै दुःखी बनायो । तर आक्रमणपछिको एक तस्वीरले नकारात्मक वातावरणमा सकारात्मक आशा जगाएको छ ।

तस्वीरमा देशकी प्रधानमन्त्री ज्यासिन्डा आर्डर्नले आक्रमणमा परेका व्यक्तिको परिवारसँग भेटघाट गरेर अँगालो हालेको देखिन्छ । मुसलमान र प्रवासीहरूविरुद्ध फैलिएको घृणाभावका बीच आर्डर्नले राजनीतिमा मानवताको सन्देश दिइन् । 


ADVERTISEMENT

उनी मुसलमान परिवारमाझ हिजाब लगाएर पुगिन् अनि मारिएका व्यक्तिप्रति श्रद्धाञ्जली दिइन् । उनको अनुहारमा उदासी थियो र आँखामा आँसु थिए । 

उनको यस तस्वीरले संसारको ध्यान आकर्षित गरेको छ । ट्विटरमा मानिसहरूले उनलाई आतंकको समयमा सकारात्मक राजनीतिको अनुहार भनी वर्णन गरे । 

धेरै मानिसले दक्षिणपन्थी नेताहरूलाई आर्डर्नबाट करुणा र प्रेमको पाठ सिक्न भनिरहेका छन् । 

पीडित परिवारसँग भेटघाटपछि प्रधानमन्त्री आर्डर्नले भने, ‘हामीहरू विविधता, करुणा र दयाको प्रतिनिधित्व गर्छौं । हाम्रो मूल्यमान्यतालाई स्वीकार गर्ने व्यक्तिका लागि यो देश घर हो । आवश्यकता भएका शरणार्थीको घर हो यो देश ।’

उनको यो बयानपछि उनी एकपटक फेरि अन्तर्राष्ट्रिय मिडियामा छाएकी छन् । यसअघि उनले गत अक्टोबरमा प्रधानमन्त्री हुँदै छोरी जन्माएकी थिइन् र संयुक्त राष्ट्रसंघको बैठकमा छोरी लिएर पुगेकी थिइन् । 

त्यतिखेर उनले संसारभरिका कामकाजी महिलालाई जागिर खाँदै अनि जिम्मेवार पदमा रहँदा पनि महिलाले आमाको जिम्मेवारी सम्हाल्न सक्ने सन्देश दिएकी थिइन् ।

बीबीसीबाट

चैत ४, २०७५ मा प्रकाशित

प्रतिक्रिया दिनुहोस