काठमाडौं–प्रमुख प्रतिपक्षी दल नेपाली कांग्रेसले कुनै राजनीतिक दललाई प्रतिबन्ध लगाएर समस्या समाधान नहुने भन्दै वार्ता र संवादको माध्यमबाट निकास खोज्न सरकारको ध्यानाकर्षण गराएको छ । 

प्रतिनिधि सभाको सोमवार बसेको बैठकमा सभामुखसँग समय लिएर नेपाली कांग्रेसका सञ्जय गौतमले विखण्डनको कुरा गर्ने सीके राउतलाई काखा र नेत्रविक्रम चन्द विप्लवको पार्टीलाई पाखा लगाउनु गलत भएको बताएका हुन् ।

‘कुनै दललाई प्रतिबन्ध लगाएर राजनीतिक निकाश आउँदैन, अराजकता निम्त्याउँछ र हिंसाको वातावरण बनाउँछ,’ उनले भने । 

सरकार अविभावक भएकाले सबै राजनीतिक दललाई वार्तामार्फत् निकासमा ल्याउने प्रयत्न गर्न उनले सुझाव दिए । 

प्रधानमन्त्रीलाई प्रश्न गर्न नपाउने ? 

कांग्रेसले महिनाको पहिलो बैठकमा प्रधानमन्त्रीसँग प्रश्नोत्तर गर्न पाउने संसद् नियमावलीको व्यवस्था कार्यान्वयन गर्न सभामुखको ध्यानाकर्षण पनि गराएको छ ।

विभिन्न विषयमा प्रधामनन्त्रीसँग प्रश्न सोध्नुपर्ने अवस्था सिर्जना भएको भन्दै सांसद गौतमले प्रधानमन्त्रीले जवाफ दिने व्यवस्था गर्न माग गरे । 

कांग्रेसको मागअनुसार सभामुख कृष्णबहादुर महराले नियमावलीको सो व्यवस्थाप्रति सरकारको ध्यानाकर्षण गराएका छन् ।

त्यसअघि सदनमा सरकारका तर्फबाट कानून मन्त्री भानुभक्त ढकालले राजपाको मागबमोजिम गिरिशचन्द्र लाल आयोगको प्रतिवेदन यथाशीघ्र सार्वजनिक गर्ने प्रतिबद्धता जनाएका थिए । 

लाल आयोगको प्रतिवेदन सार्वजनिक गर्न माग गर्दै राजपाले केही दिनयता सदन अवरुद्ध गरेको थियो ।

सरकारको जवाफपछि सदन सुचारु भएको छ ।