काठमाडौं – नेदरल्यान्ड्सको युत्रेख्त शहरमा एकजनाले ट्राममा गोली चलाउँदा कैयौं मानिस घाइते भएको प्रहरीले बताएको छ । 

शहरको पश्चिमी भागमा रहेको ट्राम स्टेसननेरको एक चोकलाई अधिकारीहरूले घेरेका छन् र आपतकालीन सेवाप्रदायकहरू घटनास्थलमा पुगेका छन् । 

आपतकालीन सेवाप्रदायकलाई काम गर्न दिनका लासग मानिसलाई घटनास्थलबाट टाढै रहन अधिकारीहरूले आग्रह गरेका छन् । 

बन्दूकधारी आक्रमणपछि कार चढेर भागेको बताइएको छ । प्रहरीले सम्भाव्य आतंकवादी उद्देश्यका विषयमा अनुसन्धान भइरहेको बताएको छ । 

स्थानीय सञ्चारमाध्यमका अनुसार, प्रतिआतंकवादी विभागका संयोजकले बैठक आह्वान गरेका छन् । प्रधानमन्त्री मार्क रटले घटनाप्रति गहिरो चिन्ता व्यक्त गरेका छन् । 

गोलीकाण्ड २४ अक्टोबरप्लाइन जंक्स्नमा स्थानीय समयअनुसार बिहान पौने ११ बजे भएको हो । 

सुरक्षा सेवाहरूले युत्रेख्तको युनिभर्सिटी मेडिकल सेन्टरलाई घाइतेको उपचारका लागि इमर्जेन्सी वार्ड खुलै राख्न भनेका छन् । 

‘एकजना मानिसले अन्धाधुन्ध गोली चलाए,’ एक प्रत्यक्षदर्शीले बताए । 

अर्का प्रत्यक्षदर्शीले एकजना घाइते महिलाको हात र कपडामा रगत देखेको बताए । 

कतिजना घाइते भएको र उनीहरूलाई कति गम्भीर चोटपटक लागेको हो भन्ने थाहा हुन सकेको छैन । 

युत्रेख्तका यातायात अधिकारीहरूले शहरका सबै ट्राम सेवा बन्द गरिएको जनाएका छन् ।

बीबीसीबाट