काठमाडौं- उज्ज्वल घिमिरेको निर्देशन रहेको फिल्म ‘लभ स्टेशन’को नयाँ गीत सार्वजनिक गरिएको छ ।

सोमबार फिल्ममा समावेश ‘मेरो आँगनीमा आज जुन उदायो...’बोलको गीत सार्वजनिक गरिएको हो । गीतमा फिल्मका मुख्य पात्र अभिनेता प्रदीप खड्का र अभिनेत्री जसिता गुरुङलाई फिचर्ड गरिएको छ । यी दुईले यसअघि फिल्म ‘लिलीबिलीमा’ जोडी बाँधेका थिए । 

यो गीतमार्फत प्रदीपले जसितालाई फकाउँदै छन् । प्रदीपका अनुसार उनी फिल्ममा एउटा लोक ब्याण्डका भोकलिस्ट (गायक)को रुपमा प्रस्तुत छन । गीतबारे प्रदीपले भने –‘लभ स्टेशन क्याफेमा म आफ्नो ब्यान्ड सहित गायनको तयारीमा हुन्छु । सोही क्याफेमा जसिताको आगमनपछि मैले उनको प्रसंशामा यो गीत गाउँछु ।’ फिल्ममा आफू कुनै स्टार कलाकार नभएर क्षेत्रिय तहको गायकको भूमिकामा रहेको पनि अभिनेता प्रदीपले बताए ।  

बरिष्ठ संगीतकार शम्भुजित बास्कोटाको संगीत रहेको यो गीतमा युवा गायक सुरेश लामाको स्वर रहेको छ । गीतलाई फिल्मकै निर्देशक उज्ज्वल घिमिरेले लेखेका हुन् । 

यही चैत्र २२ गतेबाट प्रदर्शनमा आउने तयारीमा रहेको फिल्मको प्रसारप्रसार तिव्र भईरहेको प्रस्तुतकर्ता गोविन्द शाही बताउँछन् । उनले फिल्म यूनिट मंँगलबारदेखि मोफसल यात्रामा निस्कँदैछ ।

फिल्ममा प्रदीप र जसितासँगै रमेश बुढाथोकी, प्रकाश शाह, रेशु भट्टराई, बिनोद कुमार पौड्याल, प्रिया रिजाल, सरु बिष्ट, रवी डंगोल, दिनेश काफ्ले, कालु राना लगायतको अभिनय छ । ‘लभ स्टेशन’लाई काफिया फिल्मस्को व्यानरमा काफिया शाही (क्रिसु) र कविरबिक्रम शाहीले निर्माण गरेका हुन् ।

आलोक शुक्लाको छायाँकन रहेको फिल्ममा शम्भुजीत बास्कोटा, दीपक शर्मा, राजनराज शिवाकोटी र एलिश कार्कीको संगीत छ । जसमा अर्जुन जिसी र लोकेश बज्राचार्यको सम्पादन, शिशिर खातीको कोरियोग्राफी रहेको छ ।