राप्रपा संयुक्तले भन्यो- सरकारको धम्कीबाट हामी तर्सिँदैनौं, बन्दुक बोक्दैनौं

चैत ५, २०७५

सुर्खेत- राष्ट्रिय प्रजातन्त्र पार्टी संयुक्तले आफूहरू सरकारबाट नतर्सिने र बन्दुक पनि नउठाउने बताएको छ ।

कर्णाली प्रदेशको राजधानी वीरेन्द्रनगरमा मंगलवार आयोजना गरेको पत्रकार सम्मेलनलाई सम्बोधन गर्दै राप्रपा संयुक्तकाका अध्यक्ष पशुपति शमशेर राणाले केही दिनअघि आफूहरूलाई प्रधानमन्त्री केपि शर्मा ओलीले विप्लव समूहकै लहरमा राखेको अभिव्यक्ति दिएको बताए ।


ADVERTISEMENT

‘प्रधानमन्त्रीले एक कार्यक्रममा पुराना मुद्दा उठाउने र बन्दुक उठाउने एकै हुन् भन्ने अभिव्यक्ति दिए,' अध्यक्ष राणाले भने, ‘उहाँको त्यो अभिव्यक्ति खेदजनक छ । हामी संविधानले दिएको अधिकार अनुरूप नै अघि बढछौं र हाम्रा मागहरू सडकमा लिएर जान्छौं । हामी सरकारबाट तर्सिँदैनौं र बन्दुक पनि बोक्दैनौं ।’ 

उनले आफूहरूले संघीयताको विरोध नगरेको बताए । ‘हामीले संघीयताको विरोध गरेका होइनौ,’ उनले भने, ‘दलीय राष्ट्रपति त्यो पनि गुटको हुने प्रचलनको अन्त्य गर्न तथा स्वतन्त्र संस्था बनाई सार्वभौमसत्ता र शासन जनताले नै गर्ने खाले पुरानो राजसंस्थालाई स्थापना गर्नुपर्छ भन्ने हाम्रो धारणा हो । यसले देशलाई स्थायित्व दिने हाम्रो अपेक्षा हो ।’ 

अर्का नेता डा. प्रकाशचन्द्र लोहनीले सीके राउतले नयाँ दल दर्ता गर्ने र विखण्डनवादी विचार त्याग्ने निर्णय गर्नु सवागतयोग्य भएको बताए । विप्लव समूहलाई प्रतिबन्ध लगाउँदा सत्तापक्षले पहिले आफ्नो अनुहार ऐनामा हेर्नुपर्ने बताउँदै नेता लोहनीले संविधानको मर्म र भावना अनुसार शान्तिपूर्ण रूपमा आन्दोलन गर्नु पर्नेमा जोड दिए । उनले विप्लव समूहतर्फ इंगित गर्दै बन्दुक समाउने र फेरिपनि देशलाई द्वन्द्वमा फसाउने काम भने राम्रो नभएको बताए ।

‘सरकारले कर बढायो, भ्रष्टाचार बढायो, महंगी बढायो,’ उनले भने, ‘जनताका आशमाथि तुषारापात भएको छ । अब हामी सडकबाटै भएपनि सरकारको भ्रष्ट चरित्रको विरोध गर्छौं ।’ उनले हलो चिन्हमा सहमति भए कमल थापा नेतृत्वको राप्रपासँग एकता हुने बताए ।

चैत ५, २०७५ मा प्रकाशित

शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस

ताजा समाचार