कांग्रेसले गर्यो अनुशासन र निर्वाचन समिति गठन, विप्लवलाई शान्तिपूर्ण राजनीतिमा आउन आग्रह

चैत ५, २०७५

काठमाडौँ -नेपाली कांग्रेसले अपुरो रहेको अनुशासन समितिलाई पूर्णता दिएको छ । मंगलवार पार्टी कार्यालय सानेपामा बसेको केन्द्रीय समिति बैठकले यस अघि अपूर्ण रहेको अनुशासन समितिमा थप दुई सदस्य थपेर पूर्णता दिएको हो । 

नेपाली कांग्रेसको विधान, २०१७ (संशोधित र परिमार्जित) को धारा ३४ (७) अनुसार भीष्मराज आङ्दम्वेको संयोजकत्वमा गठित 'केन्द्रीय अनुशासन समिति’को बाँकी रहेको दुई सदस्यहरुमा प्रस्तावित उमाकान्त चौधरी र  धनराज गुरुङलाई सर्वसम्मतिले अनुमोदन गरेको छ । 


ADVERTISEMENT

सोमवार अबेरसम्म बसेको बैठकले आङदम्बेको संयोजकत्वमा देवेन्द्र राज कंडेल र किशोर राठोर सदस्य रहने गरी अनुशासन समितिको गठन गरेको थियो । त्यसलाई मंगलवार साँझ बसेको बैठकले पूर्णता दिएको हो ।

बैठकले यस अघिको केन्द्रीय अनुशासन समितिको संयोजकत्व रमेश रिजालले गरेका थिए ।

त्यस्तै आज बसेको बैठकले पाँच सदस्यीय 'पार्टी नियमावली मस्यौदा समिति'को पनि गठन गरेको छ । मस्यौदा समितिको संयोजकत्व रमेश लेखकले गर्नेछन् भने मीन विश्वकर्मा, जीवन परियार, ईश्वरी न्यौपाने र प्रदीप पौडेल सदस्यका रूपमा रहनेछन् ।

आजै बसेको केन्द्रीय समितिको बैठकले निर्वाचन समिति पनि गठन गरेको छ । राधेश्याम अधिकारीको संयोजकत्वमा गोपालकृष्ण घिमिरे, खम्मबहादुर खाती, सिताराम केसी र एकराज पोखरेल सम्मिलित केन्द्रीय निर्वाचन समितिको गठन गरिएको कांग्रेस मुख्यसचिव कृष्ण पौडेलले बताए ।

बैठकले नेत्रविक्रम चन्द 'विप्लव' नेतृत्वको पार्टी नेकपालाई हत्या, हिंसा र चन्दा आतङ्कको मार्ग परित्याग गरेर शान्तिपूर्ण राजनीतिमा आउन अपिल गरेको एक केन्द्रीय सदस्यले बताए । 'निषेधको मार्गबाट होइन वार्ताको माध्यमबाट सो समूहलाई विश्वासमा लिन शासकीय योग्यता प्रस्तुत गर्न बैठकले सरकार समक्ष आग्रह गरेको छ,' उनले भने, 'दशक लामो हिंसाबाट जर्जर भएको मुलुकले भर्खरै मात्र शान्ति प्राप्त गरेको स्मरण गर्दै बैठकले सत्तारुढ र विद्रोही दुवै नेकपालाई नागरिकको जीवनप्रति गम्भीर बन्न सचेत गराएको छ ।' 

 

चैत ५, २०७५ मा प्रकाशित

प्रतिक्रिया दिनुहोस