काठमाडौँ । झन्डै तीन दशकअघि नेपालको तत्कालीन अमेरिकी राजदूत जुलिया चाङ ब्लकले प्रयोग गरेको गाडी अहिले पनि अटोमोबाइल इन्जिनियरिङका विद्यार्थीका लागि सिक्ने साधन बनेको छ ।

फोर्ड कम्पनीको नीलो रङको सो गाडी त्रिभुवन विश्वविद्यालय, इन्जिनियरिङ अध्ययन संस्थान थापाथली क्याम्पसको प्रयोगशालामा छ । वि।सं। २०४६ ताका त्यो गाडी नेपालमा भएकामध्येकै सबैभन्दा अत्याधुनिक मध्येमै पथ्र्यो । त्यसबखत अत्याधुनिक गाडी तत्कालीन राजपरिवारसँगमात्र थियो । जुलियाले प्रयोग गरेको गाडीमा पाँच हजार सीसीको पेट्रोल इन्जिन छ, जबकि नेपालमा हाल बढीमा दुई हजार सीसीसम्मका मात्र पाइन्छन् । यसमा आठ वटा सिलिन्डर छन् ।

थापाथली क्याम्पसका प्रशिक्षक सनी प्रधानले रवीभवनस्थित यूएसएडको ग्यारेजमा सो गाडी थन्किएको देखेपछि आफूले विद्यार्थीका लागि चाहियो भनेर मागेर ल्याएको बताउँदै थपे, “बिग्रिएकाले गाडी गुड्न सक्ने अवस्थामा थिएन । अर्को गाडीको सहायताले मैले तानेर ल्याएको थिए । यो गाडीले धेरै विद्यार्थीलाई अटोमोबाइलसम्बन्धी ज्ञान दिएको छ ।”
सो गाडीको मूल्य थाहा हुन नसके पनि हरेक व्यक्तिका लागि छुट्टाछुट्टै वातानुकूलित एसीको व्यवस्था भएको र त्यसमा इलेक्ट्रोनिक्स फ्युल इन्जेक्सन सिस्टम (ईएफआई) भएकाले निकै महंँगो हुनसक्ने अनुमान गरिएको छ । उनका अनुसार तीन दशकअघि नेपालमा ईएफआईको सुविधा भएका गाडी थिएनन् । अचेल यस्तो सुविधालाई नौलो मानिदैन । गोरखापत्र दैनिकमा खबर छापिएको छ ।