धनगढी- बजार पठाउन ठीक भएका माछाहरू धमाधम मरेपछि कैलालीका एक किसान चिन्तित बनेका छन् ।

माछा धमाधम मर्न थालेपछि धनगढी उपमहानगरपालिका-१२ जुगेडा बी गाउँका स्थानीय माछापालक कृषक हरि भट्ट परिवार चिन्तित बनेको छ । १५ कठ्ठा क्षेत्रफलमा रहेको अगोचर माछापालन कृषि फार्म तथा तालको २ दिनको अवधिमा करीव ३० क्विन्टल माछा मरेका हुन् । जसबाट लगभग ८ लाखको क्षति भएको छ ।

कृषक भट्टको तालको माछा मंगलवार बिहानदेखि बुधवारसम्म मर्ने क्रम रोकिएको छैन । जसले गर्दा ताल नै दुर्गंधित बनेको छ  विगत २०६० सालदेखि कृषक भट्टले सो तालमा कमन, सिल्भर, रहु, ग्रास, नैनी जातका माछा पालन गर्दै आएका थिए ।

'माछाहरूको तौल २ सय किलोग्रामसम्म पुगेको थियो । होलीलगत्तै बिक्री गर्ने योजना बनाएको थिए । तर सबै सपना चक्नाचुर भयो,' कृषक भट्टले भने, 'बैंकबाट कर्जा लिएर माछा पालन गरेको थिएँ । अब ऋण कसरी तिर्ने होला । अरू आयस्रोत नि छैन । चिन्ताले बहुत सताउन थाल्यो ।'

१६ लाख ऋण लगानी गरेर माछा पालन गर्दै आएको भट्टकी धर्मपत्नी जानकी भट्टले सुनाइन् । जसको महिनामा १७ हजार रुपैयाँ ब्याज मात्रै तिर्दे आएको उनले बताइन् । 'बच्चाहरूको पढाइदेखि घरको गुजारा यसैबाट चलेको थियो । सब चौपट भयो,' जानकीले बिलौना गरिन् ।

कृषक भट्ट परिवारको आशंका बिष हालेर मारेको हुन सक्ने अनुमान छ । तर मत्स्य विकास केन्द्र गेटामा माछा परीक्षण गराउँदा अक्सिजनको कमीउले मरेको पत्ता लागेको भट्टले सुनाए ।
अब भट्ट परिवारको एउटै आशा बीमा कम्पनीसँग छ । कृषक भट्टले तालको माछाको बीमा गराएका छन् । बीमा कम्पनीबाट केही राहत हुन्छ कि भन्ने भट्ट परिवारले आशा गरेको छ ।