काठमाडौं – फेसबूकका करीब ६० करोड प्रयोगकर्ताका पासवर्डहरू कम्पनीका सर्भरमा प्लेन टेक्स्टमा राखिएको क्रेब्सनसेक्युरिटीको एक प्रतिवेदनले खुलासा गरेको छ । फेसबूकका एक वरिष्ठ कर्मचारीलाई उद्धृत गर्दै यो खुलासा भएको हो । 

यी पासवर्डहरू फेसबूकका २० हजार कर्मचारीले भेट्न सक्ने प्रतिवेदनमा उल्लिखत छ । 

सन् २०१२ देखियताका पासवर्डहरू प्लेन टेक्स्टमा आर्काइभ गरेर राखिएको अनुसन्धानले देखाएको छ । फेसबूकको अनुसन्धान अहिले पनि जारी छ । 

फेसबूकले एउटा ब्लग प्रकाशित गरेर ती पासवर्डहरू कम्पनीबाहिरका कसैले पनि देख्न नसक्ने र कर्मचारीहरूले त्यसको दुरुपयोग नगरेको बताएको छ । 

यस विषयलाई कम्पनीका सुरक्षा इन्जिनीयरहरूले पहिलोपटक उठाएको फेसबूक सफ्टवेयर इन्जिनीयर स्कट रेनफ्रोले क्रेस्बोनसेक्युरिटीलाई बताए । ‘जनवरीमा नियमित सुरक्षा समीक्षाका क्रममा हामीले केही प्रयोगकर्ताका

पासवर्डलाई पढ्न सकिने रीडेबल फर्म्याटमा हाम्रै आन्तरिक डेटा भण्डारण सिस्टममा राखिएको पायौं,’ फेसबूकले एउटा पोस्ट प्रकाशित गर्दै जनायो ।

फेसबूकले यो विषय सल्टिसकेको र प्लेन टेक्स्टमा जसको पासवर्ड भण्डारण गरिएको हो तिनलाई सूचना दिइने जनाएको छ ।

एजेन्सी