काठमाडौं– प्रमुख प्रतिपक्षी दल नेपाली कांग्रेसले भाषण गरेर नियन्त्रण गर्नुको सट्टा वार्ता गरेर नेत्रविक्रम चन्द 'विप्लव' समूहलाई सहमतिमा ल्याउन सुझाव दिएको छ । 

संसदको हिउँदे अधिवेशनमा समापन मन्तव्य राख्दै आइतवार नेपाली कांग्रेस संसदीय दलका उपनेता विजयकुमार गच्छदारले वार्ता गरेरै समाधान गर्न सरकालाई सुभाव दिएका हुन् ।

‘विप्लव समूहको बारेमा भन्नै पर्छ, जसरी प्रधानमन्त्रीज्यूले सीके राउतलाई सुटुक्क वार्ता गरेर सहमतिमा ल्याउनु भयो, जेलबाट मुक्त गरेर निर्मूल गर्नुभयो । विप्लवलाई पनि सुटुक्क वार्ता गरेर ल्याउनुस्, प्रधानमन्त्रीले ठूलो भाषण गरेर नियन्त्रण गर्ने कुरा ठीक होइन, वार्ता गरेर सहमति गर्नुपर्‍यो, ' गच्छदारले भने । 

उनले मुलुकमा भ्रष्टाचार नियन्त्रण नभएको बताउँदै भने, 'भ्रष्टाचार नियन्त्रण भयो भने वाइडवडी कहाँ गयो ? आकाशमा उडेर गयो ?'

गच्छदारले सरकार सदनबाट भागिरहेको आरोप लगाए । उनले भने, 'जब सदनमा प्रश्न उठ्छ, सरकार भाग्छ । सदनप्रति सरकार उत्तरदायी हुन सकेको छैन ।'