विराटनगर- विराटनगरमा पछिल्लो १२ घण्टामा ४ वटा आगलागीका घटना भएको छ । क्षमताभन्दा बढी विद्युत प्रवाह हुँदा ट्रान्समिटर पड्किएर तथा विद्युत सर्ट भएर आगलागी भएको हो । प्रधिकरणबाट क्षमताभन्दा बढी भोल्टेज प्रवाह गरेका कारण विभिन्न स्थानमा आगलागी भएका छन् । अत्याधिक विद्युत प्रवाहका कारण १२ घण्टामा यी ठाउँमा आगलागी भएको हो ।

घटना १

विराटनगर १५ धुनिया बस्तीमा आगलागी भएको छ । विराटनगर १५ निवासी अखिलेश साहको एकतले घरमा आगलागी भएको हो । विद्युत सर्ट भई घरमा रहेका लत्ताकपडा, टिभी, फ्रिज अन्नपात गरी करीब एक लाख बराबरको क्षति भएको प्रहरीले जनाएको छ । आगलागी स्थानियवासी र रानी प्रहरीको प्रयासमा नियन्त्रण लिएको ईलाका प्रहरी कार्यलय रानी विराटनगरका प्रहरी निरीक्षक ईन्द्र बहादुर रानाले जानकारी दिए ।

घटना २

विराटनगर १३ मलाय रोडमा रहेको पोलिट्याङ्क गोदाममा आगलागी भएको छ । मलाय रोडस्थित पुरानो प्लाष्टिकको गोदाममा राखिएको प्लाष्टिकमा आगलागी भएको छ । आगलागी विराटनगर महानगरपालिकाको २ वटा दमकल, ईलाका प्रहरी कार्यलय रानी प्रहरी र शसस्त्र प्रहरीको सहयोगमा नियान्त्रणमा आएका आएको छ ।

चाउ–चाउ, बिस्कुट र साबुनको खोलमा प्रयोग गरिने प्लाष्टिक गोदाममा आगालागी भएको थियो । आगलागीबाट करिब ५५ हजार बराबरको क्षति भएको ईलाका प्रहरी कार्यलय रानी विराटनगरले जनाएको छ ।

घटना ३

विराटनगर ११ महेन्द्र चोक पश्चिम कान्छादाई मार्गमा गएराति विजुलीको पोलमा आगलागी भएको छ । राष्ट्रिय समाचार समितिको कार्यालय अगाडि रहेको बिजुलीको पोलमा आगलागी भएको थियो । अत्याधिक भोल्टेज प्रवाह भएको कारण सोमबार राति बिजुलीको पोलमा आगलागी भएको स्थानियबासीले बताएका छन् । आगो स्थानियवासी र प्रहरीको सहयोगमा नियन्त्रणमा आएको थियो । बिजुलीको पोलमा अचानक आगलागी भएपछि स्थानियबासीका लाईन अवरुद्ध हुदाँ समस्यामा परेको स्थानिय तेजेन्द्र भण्डारीले बताए ।

घटना ४

विराटनगर १० स्थित संसारी माइस्थान अगाडि बिजुलीको पोलमा मंगलवार आगलागी भएको स्थानिय कुमार विमलीले जानकारी दिए । दिउसो १२ बजेको समयमा बिजुलीको पोलको तारमा विद्युत सर्ट भइ आगलागी भएको हो । आगलागीबाट विभिन्न ईन्टरनेट र केवलहरुको लाईन र बिजुलीको पोलमा क्षति पुगेको छ । स्थानियवासी र प्रहरीको सहयोगमा उक्त आगो नियन्त्रणमा लिईएको छ ।