वीरगञ्ज पुर्‍याइएको घाइते छोराको चिन्तामा कलैया अस्पतालमा तड्पिँदै बुवा

चैत १८, २०७५

बारा – पर्शुराम पासवान कलैया उपमहानगरपालिका वडा नम्बर १२ स्थित धर्मनगरमा किराना पसल सञ्चालन गरेर बस्थे ।

आइतवार पनि उनको दिनचर्या पहिलेजस्तै थियो । बेलुका पसल बन्द गरेर दिनभरिको व्यस्ततालाई बिसाउने तयारी हुँदैथियो ।


ADVERTISEMENT

एक्कासि जोडले हावा चल्यो । फूसको घर हावाले उडायो । उनको टाउकोमा पनि केही चीज आएर बज्रियो । सँगै रहेका छोरा सचन पासवान पनि घाइते भए ।

हावाहुरी त पहिले पनि चल्थ्यो, तर आइतवारको हावाहुरी पहिले भन्दा विनाशकारी भएर निस्कियो ।

पर्शुराम अहिले जिल्ला अस्पताल कलैयामा उपचाररत छन् । आफैं अस्पतालको बेडमा रहेका उनलाई आफ्नो भन्दा चिन्ता छोराको छ ।

उनलाई प्रहरीले उद्धार गरी कलैया अस्पताल ल्यायो । छोरालाई उपचारका लागि नारायणी उपक्षेत्रीय अस्पताल वीरगञ्ज पुर्‍याइएको छ ।

पर्शुराम छोराको अवस्था थाहा नपाएर चिन्तित छन् । आफ्नो भन्दा चिन्ता उनलाई छोराको छ ।

बाराकै फेटा गाउँपालिका भरबलियाका पर्मा कुर्मी पनि कलैया अस्पतालमा उपचाररत छन् । उनको परिवारका अन्य सदस्यहरू समेत घाइते भएका छन् ।

उनी कलैयामा छन्, आफन्तहरूलाई वीरगञ्ज र काठमाडौं पुर्‍याइएको छ । आफ्नो चोट त छँदैछ, त्यो भन्दा बढी चिन्ता उनलाई आफन्तको छ ।

घाइते हुनेमा भारतीय नागरिकहरू पनि छन् । त्यसमध्ये एक हुन्, मोतिहारी बकुलियाका विश्वनाथ पटेल । उनी धर्मनगरमै इँटा भट्टामा काम गर्थे ।

हावाहुरीसँगै खसेको असिनाले टाउकोमा चोट लागेको छ, भाग्न खोज्दा खुट्टा पनि भाँचिएको छ ।

‍बेड नपुग्दा भुइँमै राखेर उपचार !

करीब साढे ३ सय जनाको उपचार जिल्ला अस्पताल कलैयामा भइरहेको छ ।

बेड नपुगेपछि भुइँमा राखेर समेत उपचार भइरहेको देख्न सकिन्छ ।

अधिकांशको टाउको र हातखुट्टामा चोट रहेको अस्पतालको आकस्मिक कक्षमा कार्यरत अहेव नवलकिशोर पण्डितले बताए ।

अर्का अहेव मनोजकुमार यादवले पनि टाउकोमा चोट लागेकाहरूमा रिंगाटा लाग्ने, बेहोस हुन्, बान्ता हुनेजस्ता समस्या पनि देखिएको बताए ।

निमित्त मेडिकल सुपरिन्टेन्डेन्ट डा. त्रिभुवन झा, ७ जना मेडिकल अधिकृत, ५ अहेव र ५ जना स्टाफ नर्स उपचारमा खटिएका छन् ।

मृतकमध्ये १८ जनाको शव अस्पतालमै राखिएको छ ।

हेर्नुहोस्, घाइतेहरूको तस्वीर :

चैत १८, २०७५ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस