जनकपुरधाम - आइतवार साँझ आएको आँधीबेहरीका कारण ठूलो जनधनको क्षति भएको बारा र पर्सा जिल्लाका क्षेत्रमा गएर राहत वितरण गर्ने नाउँमा सेल्फी लिने र सामाजिक संजालमा राख्ने एक किसिमको फेशन नै चलेको देखिएको छ । दिनहुँजसो थोरै राहतका सामान लिएर जाने र सेल्फी लिँदै समाज सेवी बन्नेहरूको लामो लर्को छ ।

राहतका लागि सामान लग्दा प्रायजसोले खाने सामग्री (चाउचाउ, बिस्कुट) मात्रै लिएर जाने गरेका छन् ।

लोकान्तरको स्थलगत रिपोर्टिङका क्रममा महिलाहरूका लागि सेनिटरी प्याड समेत राहतका रूपमा लिएर आउन त्यहाँका महिलाले सुझाव दिएको समाचार प्रकाशित गरेको थियो ।

त्यही समाचार पढेर बिरगंजस्थित हरि खेतान कलेजका केही प्राध्यापकहरूले आफ्नै निजी पहलमा महिलाका लागि सेनिटरी प्याड वितरण गरेका छन् ।

प्रिती सिंह, पदमा पौडेल, पुजिता धमला, रन्जना घिमिरे, अभिलाषा कर्ण, रीतिका जयसवाल लगायतले बारा जिल्लाको फेटा गाउँपालिकाको पुरैनियामा गएर प्याड , टर्च, तन्ना, बिस्कुट जस्ता सामानहरु वितरण गरेका छन् । ‘त्यहाँ राहत लिएर जाने सबैले सेल्फी लिने गरेका थिए,’ प्रिती सिंहले भनिन्, ‘तर हामीले धेरैलाई सेल्फी किन लिएको भनेर समेत प्रश्न गर्यौं ।’

'लोकान्तरमा समाचार आएपछि महिलाको दृष्टिकोणले हामी संवेदनशील भयौं र ६ महिना पुग्ने गरी प्याड  वितरण गर्यौं, उनले भनिन् । त्यहाँ बिजुली नभएका कारण अँध्यारोमा समस्या हुन्छ भन्दै टर्च पनि वितरण गरेको उनले बताइन् ।

उक्त सामान राहतका रूपमा लिन पाउँदा महिलाहरू अत्यन्तै खुशी भएको र बाँकी मानिसले पनि राहत लिएर जाँदा खानेकुरा भन्दा पनि आवश्यक पर्ने अन्य सामग्रीहरू लिएर जान उनी सुझाव दिइन् । ३० घर परिवारका लागि उनीहरूले राहत वितरण गरेका हुन् ।