काठमाडौं – चालू वर्षको अन्त्यतिर फिल्म हलमा ‘लभ स्टेशन’ प्रदर्शनरत छ । 

आउँदो शुक्रवार अर्थात् चैत २९ गतेबाट प्रदर्शनमा आउने चलचित्र ‘ए मेरो हजुर ३’ र ‘यात्रा’लाई छाड्ने हो भने यस वर्ष ९४ वटा चलचित्र प्रदर्शनमा आइसकेका छन् ।

ती २ चलचित्रलाई जोड्दा यस वर्ष प्रदर्शनमा आउने चलचित्रको संख्या ९६ पुग्छ । तर नाफामा जाने चलचित्रको संख्या हेर्ने हो भने निकै कम छ ।

वर्षको शुरूवाती ४ महिना त हलमा दर्शकको खडेरी नै लाग्यो । त्यो खडेरी पाचौं महिना भदौंमा प्रदर्शनमा आएको चलचित्र ‘नाइँ नभन्नू ल ५’ले केही उकास्ने काम गर्‍यो ।

हल सञ्चालक, चलचित्रकर्मी, दर्शकमा यो चलचित्रले एकखालको उत्साह थप्ने काम गर्‍यो । अन्नतः चलचित्रले लगानी सुरक्षित गर्दै निर्मातालाई केही नाफा दिलायो । 

असोजमा प्रदर्शनमा आएको ‘छक्का पञ्जा ३’ त १६ करोड रुपैयाँ बढीको व्यापार (निर्माताको जानकारी अनुसार) गर्दै सफल सावित भयो ।

असोजमै प्रदर्शनमा आएको अर्को चलचित्र ‘जय भोले’लाई पनि दर्शकले साथ दिए । चलचित्रले पनि लगानी सुरक्षित गर्दै निर्मातालाई केही नाफा हात लाग्यो । 

शुरूवाती महिनामा निराशा रहेको चलचित्रको व्यापारलाई मध्यतिर प्रदर्शनमा आएका चलचित्रले आशा जगाउने काम गरे । तर त्यसपछिका महिना फेरि उही – हलमा दर्शकको खडेरी । त्यसपछिको बाँकी महिना कुनै पनि चलचित्र नाफामा जान सकेनन् । 

वर्षभर ३ चलचित्रले नाफा कमाउँदा केही चलचित्रले औसत व्यापार गर्दै लगानीसम्म सुरक्षित गरे । बोबी, रामकहानी, इन्टू मिन्टू लण्डनमा, चंगा चेट, प्रसाद, क्याप्टेनले लगानी सुरक्षित गरेको बताइन्छ । प्रदर्शनरत चलचित्र ‘लभ स्टेशन’को शुरूवाती व्यापारलाई हेर्दा लगानीसम्म सुरक्षित गर्ने निर्माण टीमको आशा छ । यी बाहेक अरुको अवस्था बिजोक रह्यो । 

केही चलचित्रले डिजिटल प्लेटफर्म र विदेशबाट जेनतेन लगानी उठाएपनि हलमा दर्शक गएरै लगानी नउठाएसम्म चलचित्रलाई सफल मानिँदैन । यसरी हेर्दा ८५ बढी नेपाली चलचित्रले निर्मातालाई घाटा दिलाए ।

चालू वर्ष आशा गरेका चलचित्र समेत चलेनन् । स्टार मानिएका कलाकारको सहभागिता रहेका चलचित्रले समेत अपेक्षित व्यापार गर्न सकेनन् । दर्शकले अपेक्षा गरेका केही चलचित्रको कथा नै रुचाएनन् । चलचित्रमा लगानी करोडौं गर्ने तर कन्टेन्टमा ध्यान नदिने पुरानै प्रवृत्ति देखियो । 

चलचित्र क्षेत्रबारे नबुझेका व्यक्तिलाई ‘मुर्गा’ बनाएर आफू निर्देशक, हिरो बन्ने परिपाटी पनि केही मात्रामा देखियो । डुबेपछि निर्माता–निर्देशक आफ्नो चलचित्रले यति कमायो, उति कमायो भनेर झूटा चर्चा समेत गरेको पाइयो ।

यस वर्ष पनि समीक्षक र चलचित्रकर्मीबाट तारिफ पाएका चलचित्रले नै गतिलो व्यापार गर्न सकेनन् । जसमा हरि, बुलबुल, साइँली लगायतलाई लिन सकिन्छ । यी चलचित्रलाई समीक्षकले राम्रो प्रतिक्रिया दिएका थिए । 

२०७५ सालको मध्यतिर हलमा चहलपहल देखिएपनि अधिकांश महिना हलमा दर्शकको खडेरी देखियो । यत्तिसम्म कि दर्शक हराएको भन्ने चर्चा नै चल्यो । यसरी हेर्दा नेपाली चलचित्रका लागि २०७५ साल दुःखद मात्र होइन, अति दुःखद रह्यो ।

यसपालि चलचित्र किन चलेनन् ? हलमा दर्शकको किन खडेरी लाग्यो ? सम्बन्धित क्षेत्रका सबै गम्भीर हुनु आवश्यक देखिन्छ, किनकि आउँदा वर्ष चलचित्रमा गरिएको लगानी वालुवामा पानी सरह नहोस् । कामना गरौं – वर्ष २०७६ चलचित्रका लागि उत्सवको वर्ष बनोस् !