काठमाडौं – नियम पालना नगर्ने झण्डै ८ सय सरकारी कर्मचारीलाई सरकारले कारवाही गरेको छ ।

अनुमगनका क्रममा नियम पालना नगरेको पाइएपछि राष्ट्रिय सतकर्ता केन्द्रले गरेको सिफारिसका आधारमा ७ सय ९९ जना सरकारी कर्मचारी कारवाहीमा परेका हुन् ।

राष्ट्रिय सतर्कता केन्द्रले चालू आर्थिक वर्षको चैत २० गतेसम्म गरेको अनुमगनमा १ हजार ५ सय ३४ जनाले निमय पालना नगरेको पाइएको थियो । अनुमगनका क्रममा १ हजार १ सय ३५ जना कर्मचारीले समयमै कार्यालय नपुग्ने र ३ सय ९९ जनाले तोकिएको पोशाक नलगाएको भेटिएको थियो । सोही अनुसार समयमा कार्यालय नपुग्ने र तोकिएको पोशाक नलाउने कर्मचारीलाई कारवाही गर्न भन्दै सम्बन्धित कार्यालयलाई केन्द्रले सिफारिस गरेको थियो ।

सिफारिसको आधारमा हालसम्म ७ सय ९९ जना कर्मचारीलाई कारवाही गरिएको विवरण कार्यालयमा आएको सतर्कता केन्द्रका सहसचिव विष्णुप्रसाद लामिछानेले बताए ।

नियम पालना नगर्ने कर्मचारीलाई निजामती सेवा ऐनको दफा ५५ अनुसार कारवाही गरिएको हो । सहसचिव लामिछानेले निजामती सेवा ऐन अनुसार कारवाही गरिएको जानकारी दिँदै नियम पालना नगर्ने कर्मचारीलाई कारवाहीस्वरुप चेतावनी दिइएको बताए ।

‘पहिलो र दोस्रो पटक चेतावनी हुन्छ,’ उनले भने, ‘तेस्रो पटक पनि दोहोर्यायो भने विभागीय कारवाही हुन्छ ।’

यसअघि सतर्कता केन्द्रले काठमाडौं उपत्यका सहितका ३२ जिल्लाका सरकारी कार्यालयमा अनुमगन गरेको थियो । सतर्कता केन्द्रले तनहुँ, सिन्धुपाल्चोक, सिराह, बारा, पर्सा, गोरखा, लमुजङ, सिन्धुली, महोत्तरी जिल्लाका सरकारी कार्यालयमा अुनमगन गरेको जनाएको छ ।

ओखलढुंगा, सोलुखुम्बु, बैतडी, धादिङ, नुवाकोट, रुकुम पश्चिम, दाङ र कास्की जिल्लाका गरी ५ सय १९ सरकारी कार्यालयमा अनुगमन गरिएको केन्द्रको तथ्यांक रहेको छ । विभिन्न जिल्लाका स्थानीय तह, जिल्ला कृषि कार्यालय, जिल्ला वन कार्यालय, मालपोत कार्यालय, नापी गरी प्रायःजसो सबै कार्यालयमा अनुमगन गरिएको सतर्कता केन्द्रले जनाएको छ ।

केन्द्रले यसअघि समेत अनुमगनको क्रममा समयको पालना गर्ने नगरेको, तोकिएको पोशाक नलगाएकाजस्ता कैफियत भेटिने गरेकाले नियम उल्लंघन नरोकिएको अनुमान लगाउन सकिने जानकार बताउँछन् ।