सरकारी वेबसाइटमा क्रिश्चियन धर्म प्रचार, प्रभू यशुको 'अद्भुत' विज्ञापन !

बैशाख २, २०७६

काठमाडौं – राष्ट्रिय भूकम्प मापन तथा अनुसन्धान केन्द्रको वेबसाइट www.seismonepal.gov.np खोल्नुभयो भने मास्टहेड भन्दा ठ्याक्कै मुनि एउटा विज्ञापन देख्न सक्नुहुन्छ ।

भूकम्पसम्बन्धी सूचना दिने उक्त सरकारी वेबसाइटमा तीन ठाउँमा गूगलले दिएको विज्ञापनका लागि स्पेस छुट्याइएको छ ।


ADVERTISEMENT

सरकारी निकायलाई सरकारले नै बजेट उपलब्ध गराउँछ । गूगलको विज्ञापन वेबसाइटमा राखेर पैसा कमाइराख्नुपर्ने अवस्था हुँदैन ।

सोमवार बिहान १० बजेपछि सिस्मो नेपालको बेवसाइट खोल्दा क्रिश्चियन धर्म प्रचार गर्ने खालका विज्ञापनहरू देखिए  । तीनवटै स्पेसमा सोही प्रयोजनका विज्ञापन थिए ।

‘ईश्वरीय सहायता चाहते हैं ?’, ‘यीशु के बारे में अद्भुत तथ्य’, ‘परमेश्वर के निकट आएँ’ लगायतका विज्ञापन सिस्मो नेपालको बेवसाइटमा देखिए ।

गूगल एडका लागि स्पेस दिएपछि उसले यो क्षेत्रमा लक्षित विज्ञापनहरू विना राेकटोक देखाउने गर्छ ।

सरकारी वेबसाइटमा गूगलको विज्ञापन राख्नुको कारण जान्न हामीले भूकम्प मापन केन्द्रमा सम्पर्क गर्‍यौं । लोकान्तरको सम्पर्कमा आएका सेस्मोलोजिस्ट चिन्तन तिमिल्सिनाले यसलाई प्राविधिक त्रूटिका रूपमा औंल्याए ।

‘तपाईंले बेवसाइटमा गूगल म्याप देख्न सक्नुहुन्छ, त्यसमा केही दिनअघि कालो स्क्रिन मात्र देखिने समस्या आयो । हामीले डेभलपरसँग कुरा गर्‍यौं । पैसा तिरेर राख्नुपर्नेमा उसले फ्रिको राखिदिएछ, त्यसो गर्दा गूगलको विज्ञापन आउने रहेछ,’ तिमिल्सिनाले भने, ‘हामीले कुरा गरिसकेका छौं, एकदुई दिनमा यो समस्या समाधान हुन्छ ।’

यसलाई प्राविधिक कमजोरी भन्दै उनले छिट्टै समाधान हुने बताए ।

बैशाख २, २०७६ मा प्रकाशित

जी भट्ट

भट्ट ‘लोकान्तर’का डेस्क सम्पादक हुन् ।

लेखकबाट थप...

प्रतिक्रिया दिनुहोस