विश्वकप क्रिकेटको एसिया छनौटमा नेपालले मलेसियालाई हरायो

बैशाख २, २०७६

काठमाडौं – मलेसियामा जारी आईसीसी १९ वर्षमुनि (यू–१९) एकदिवसीय विश्वकप क्रिकेटको एसिया छनोट प्रतियोगिताअन्तर्गत सोमवार भएको तेस्रो खेलमा नेपालले मलेसियालाई पराजित गरेको छ ।

मलेसियाको क्वालालाम्पुरस्थित बायुमास ओभल मैदानमा भएको खेलमा नेपालले मलेसियालाई ८ विकेटले पराजित गर्दै विजयी भएको हो । ३ खेल खेलेको नेपालको यो दोस्रो जीत हो । नेपालले ३ खेलबाट ४ अंक जोडेको छ ।  


ADVERTISEMENT

यसअघि छनोटको पहिलो खेलमा नेपालले सिंगापुरलाई २१७ रनको भारी अन्तरले पराजित गरेको थियो भने दोस्रो खेलमा नेपाल संयुक्त अरब इमिरेट्स (युएई)सँग १ रनले पराजित भएको थियो ।

टस हारेर पहिले ब्याटिङ गरेका मलेसियाले नेपाललाई ९३ रनको विजय लक्ष्य दिएको थियो । जवाफमा नेपालले १३ ओभरमा मात्र २ विकेट गुमाउँदै भेटायो । 

नेपालको जीतमा शुरूवाती ब्याट्स म्यान रित गौतमले सर्वाधिक ३९ रन बनाए । ४५ बल खेलेका उनले ५ चौका प्रहार गर्दै ३९ रनमा अविजित रहेका हुन् । आसिफ शेखले २६ तथा पवन सर्राफले १९ तथा कप्तान रोहित पौडेल ६ रनमा अविजित रहे । 

बलिङतर्फ मलेसियाका साफिक स्याकिर र सुक्री मादेलीले १–१ विकेट लिए । त्यसअघि पहिले ब्याटिङ गरेको मलेसियाले ३३ दशमलव ५ ओभरमा सबै विकेट गुमाउँदै ९२ रनमा समेटिएको थियो ।

मलेसियाका लागि लेजाड ड्यानियल बिन अहमेदले सर्वाधिक ३७ रनको योगदान दिए भने कप्तान मोहमद अमिरले १३ तथा हाकिम हरिसनले १० रन बनाए ।

नेपालका पवन सर्राफ र कुशल मल्लले ३–३ विकेट लिए भने कमलसिंह ऐरीले २ विकेट झारे । अब नेपालले आफ्नो चौथो खेल मंगलवार ओमानसँग खेल्ने छ । छनोट प्रतियोगिताको विजेताले सन् २०२० मा दक्षिण अफ्रिकामा आयोजना हुने विश्वकपमा प्रवेश गर्नेछन् ।

बैशाख २, २०७६ मा प्रकाशित

प्रतिक्रिया दिनुहोस