काठमाडौं – सानेपास्थित नेपाली कांग्रेसको केन्द्रीय पार्टी कार्यालयको ढोकैमा एक युवा आमरण अनशनरत भेटिए ।

आफूमाथि लागेको हत्या आरोप निराधार रहेको र न्याय पाउनुपर्ने भन्दै आमरण अनशनमा बसेका युवा कास्कीका तत्कालीन नगर सभापति राजेन्द्रमणि लामिछाने थिए ।

उनलाई साविकको लेखनाथ–१ का कांग्रेस कार्यकर्ता रामजी पौडेल ‘बादल’को हत्या आरोप लागेको थियो । 

२०७२ साउन २८ गते राति लेखनाथ–१२ गगनगौडामा भएको हत्याकाण्डमा संलग्नताको आशंकामा साउन ३० गते पक्राउ परेका लामिछाने २६ दिनपछि रिहा भएका थिए । उनलाई जिल्ला सरकारी वकिलको कार्यालयले लामिछानेविरुद्ध मुद्दा नचल्ने जानकारीसहित रिहाको लागि पठाएको पत्रको आधारमा छाडिएको थियो ।

तर हत्या गरिएका रामजी पौडेलकी पत्नी चन्द्रावती पौडेलले लामिछानेविरुद्ध पुनः उजुरी दिएपछि आफू न्यायका लागि आमरण अनशन बसेको उनले बताए । पौडेल हत्याको सत्यतथ्य र निष्पक्ष छानबिनका लागि आफू अनशन बसेको लामिछानेको दाबी थियो ।

‘कहीँकतै संलग्न नभएको र जिल्ला प्रहरी कार्यालय कास्कीले पनि मविरुद्ध मुद्दा चल्ने गरी प्रमाण नभेटेको अवस्थामा मलाई किन फसाइँदै छ ?’ उनले प्रश्न गरे ।

लामिछाने आमरण अनशन बसेको ५ दिन भइसकेको छ । तर कांग्रेसका नेताले आफूलाई वास्ता नगरेको उनको आरोप छ । यसबारेमा कांग्रेस उपसभापति विमलेन्द्र निधिले पार्टी सूचित रहेको बताए । ‘पार्टीले उहाँको अनशनलाई नोटिस गरेको छ, हामी छिट्टै यसबारेमा आवश्यक निर्णय गर्नेछौं,’ निधिले लोकान्तरसँग भने ।

लेखनाथ नगर समितिको सभापतिको लागि कार्यकाल दोहोर्याउने सोचमा रहेका लामिछाने र अर्का दावेदारबीचको मनमुटावले घटना भएको पार्टी कार्यकर्ताले नै आरोप लगाएका भएपनि प्रमाण नभेटिएको आधारमा लामिछाने छुटेका थिए । उनी पहिलोपल्ट हिरासतमा रहँदै अनशन बसेका थिए ।

पार्टी कार्यकर्ताबाटै हत्यामा संलग्नताको आरोप लागेपछि प्रहरीले लामिछानेलाई पोखराबाट पक्राउ गरेको थियो ।