काठमाडौं- प्रधानमन्त्री केपी शर्मा ओलीले नेपाललाई निरक्षरहरूको नभई विद्वानहरूको देश बनाउनुपर्ने बताएका छन् । 

विद्यालय भर्ना अभियानका सन्दर्भमा बुधवार बालुवाटारमा नेकपा निकट युवा तथा विद्यार्थीहरूसँग अन्तरक्रिया गर्दै प्रधानमन्त्री ओलीले सो कुरा बताएका हुन् ।

'नेपाललाई निरक्षरहरूको होइन, विद्वानहरूको देशको रूपमा पहिचान बनाउनुपर्छ,' प्रधानमन्त्री ओलीले भने, 'हाम्रा विद्वान पुर्खाको जेनेटिक मेमोरीको उपयोग हामीले गर्नुपर्छ । विद्वान पुर्खाका सन्तान हामी केही समय निरक्षर रह्यौं तर अब यो अवस्था रहिरहन सक्दैन ।' 

प्रधानमन्त्री ओलीले बालबालिका विद्यालय भर्नाका लागि अभिभावक सचेतना सञ्चालन गर्नुपर्ने बताए । 'शिक्षाको महत्व अभिभावकलाई बुझाउनुपर्छ,' ओलीले भने, 'त्यसपछि मात्र उनीहरूलाई छोराछोरी पढ्न पठउँछन् ।'

प्रधानमन्त्री ओलीले युवा र विद्यार्थीहरूले अब सृजनशील र समाज सुधारको काममा लाग्नका लागि कुनै अवरोध नरहेको स्पष्ट पारे । उनले अहिले आन्दोलनको  स्वरूप फेरिएको स्पष्ट पार्दै भनेका छन्, 'अब राजनीतिक संघर्ष र आन्दोलन गर्नुपर्ने दिन सकिएका छन् । अब युवाले समाज सुधारका लागि शिक्षा,स्वास्थ्य,श्रम,सीप र उत्पादन जस्ता कुरामा ध्यान दिनुपर्छ ।'

गत वर्षदेखि विशेष रूपले शुरू गरिएको विद्यार्थी भर्ना अभियानलाई घरघरमै गएर सञ्चालन गर्न प्रधानमन्त्री ओलीले विद्यार्थी र युवालाई आग्रह गरे । 'विकास र समृद्धिको महत्वपूर्ण माध्यम शिक्षा हो । हामीले समृद्धि हासिल गर्नका लागि शिक्षाको स्तर उठाउनुपर्छ । यसका लागि तपाईंहरूको भूमिका महत्वपूर्ण हुन्छ । यस वर्षदेखि विद्यालय उमेरका कोही बालबालिका पनि विद्यालय बाहिर हुनुहुँदैन,' प्रधानमन्त्री ओलीले भने ।