मंगलवार राति इटालीको टुरिनमा युभेन्टसविरुद्ध आयाक्सले प्राप्त गरेको विजयको एउटा भिडियो क्लिप अहिले सामाजिक सञ्जालमा खुबै भाइरल भइरहेको छ । त्यो क्लिपले डच टोली र यस सीजनमा उनीहरूको उल्लेखनीय च्याम्पियन्स लीग यात्रालाई गजबले चित्रित गरेको छ । 

सेकेन्ड हाफको १० मिनेट हुँदा स्कोर १–१ को बराबरीमा छ । 

आयाक्सका गोलकीपर आन्द्रे ओनानाले बक्सको किनाराबाट बल लिएर डिफेन्डरलाई पास दिन्छन् अनि खेलाडीहरूले सानासाना पास र त्रिकोणीय पासको सिलसिला अघि बढाउँछन् र युभेन्टसको बक्समा पु¥याउँछन् । हकिम जियेचको शट अनि ब्लक हुन्छ । 

यति सुन्दर सिक्वेन्स बने पनि गोल त हुन सक्दैन तर यो रोमाञ्चकारी र मन्त्रमुग्ध बनाउने खेल प्रदर्शन चाहिँ हो र जम्मा २० सेकेन्डको यो सिक्वेन्स नै यस सीजनको च्याम्पियन्स लीगमा आयाक्सको योगदानलाई सारांशमा बताउन पर्याप्त छ । 

एरिक टेन हागको प्रशिक्षणमा रहेको टोली यसपालिको च्याम्पियन्स लीगको नकआउट चरणमा रहेका सबै टोलीभन्दा कान्छो हो किनकि त्यसका खेलाडीको सरदर उमेर नै २४ वर्ष मात्र छ । 

तर यो युवा टोलीले आफूभन्दा ठूलालाई कुनै सम्मान दर्शाएका छैनन् । 

अन्तिम १६ मा रियाल मड्रिडलाई आउट गरेर मात्र आयाक्स सन्तुष्ट भएन । मंगलवार राति उसले टुरिनमा अर्को ठूलो टोली युभेन्टसलाई ध्वस्त पारिदियो अनि रोनाल्डोलाई पनि डुबाइदियो । उक्त खेल २–१ ले जितेर उसले समग्रमा ३–२ को विजय हासिल गर्दै सेमीफाइनलमा स्थान बनायो । 

आधुनिक फूटबलमा देखिएको आर्थिक असन्तुलनलाई पनि आयाक्सले मतलब नगरेको देखिन्छ । 

I mean this build-up by Ajax is one of the most beautiful things I've seenpic.twitter.com/Toq1ZLcLck

— USMNT Videos (@USMNTvideos) April 16, 2019

आम्स्टर्ड्यामको यो क्लबका सबै खेलाडीको तलब जोड्दा पनि जम्मा ४० लाख युरो पुग्छ जबकि रोनाल्डोले कर कटाउँदा समेत त्यसभन्दा बढी तलब एक्लैले लिन्छन् । 

मंगलवारको खेलमा स्टार्ट गर्ने पूरै आयाक्स टीमका खेलाडीको मूल्यभन्दा दोब्बर जति बढी त युभेन्टसले रोनाल्डोलाई भित्र्याउनका लागि नै खर्चेको थियो । 

तर सामाजिक सञ्जालमा हाल खुबै शेयर गरिएको योहान क्रूफको प्रसिद्ध उद्धरण यस्तो छ : ‘तिमीले आफूभन्दा धनी क्लबलाई किन जित्न नसक्ने ? पैसाको बोराले गोल गरेको मैले कहिल्यै देखेको छैन ।’

वास्तवमा अहिलेको आयाक्स क्लबले क्रूफ र महान् खेलाडी राइनस मिचेल्सको टोटल फूटबल विरासतलाई अघि बढाउँदै निडर र आक्रामक फूटबल खेलिरहेको छ । सन् १९७० को दशकमा आयाक्सले युरोपेली कप लगातार तीनपटक जितको थियो । 

आयाक्सले च्याम्पियन्स लीग पछिल्लोपटक सन् १९९५ मा जितेको थियो । त्यतिखेरको उत्कृष्ट टोलीमा फ्र्यांक राइकार्ड, डी बोएर दाजुभाइ, क्लारेन्स सीडोर्फ, एड्गर डेभिड्स र प्याट्रिक क्लुइभर्ट थिए र क्लबले भिएनामा एसी मिलानलाई हराएको थियो । 

आयाक्सले हालैका वर्षमा प्रतिष्ठित खेलाडी बेच्नुपरेको थियो तर वास्तवमा भन्नुपर्दा युरोपका धनी क्लबहरूले सीजनैपिच्छे आयाक्सका खेलाडीलाई किनेर लग्ने गरेका छन् । 

सन् २०१७ को युरोपा लीगको फाइनलमा आयाक्स टीम म्यानचेस्टर युनाइटेडसँग हारेको थियो । त्यसपछि क्लबका व्यवस्थापक पिटर बोजलाई जर्मनीको प्रभावशाली क्लब बोरुसिया डर्टमन्डले लगेको थियो । 

युरोपका ठूला टीमले आयाक्सका वर्तमान खेलाडीहरूलाई किन्ने पक्का छ । आयाक्सको फूटबल एकेडमीमा अत्यन्तै प्रतिभाशाली खेलाडी छन् र क्लबले अन्तबाट पनि राम्रा खेलाडी भित्र्याउँछ । 

मिडफील्डर फ्रेंकी डी जोङ र कप्तान म्याथिस डी लिट आयाक्सको एकेडमीकै उत्पादन हुन् र उनीहरूलाई डच परम्पराको उत्कृष्ट फूटबलको प्रशिक्षण दिइएको छ । 

यस सीजनको अन्त्यमा डी जोङ बार्सिलोना जाँदैछन् र बार्साले उनका लागि आठ करोड युरो तिर्न सम्झौता गरेको छ । डी लिट चाहिँ क्लबका निडर खेलाडीहरूमध्ये एक हुन् र उनी कि त बार्सिलोना जानेछन् कि त प्रेमियर लीगको कुनै क्लब प्रवेश गर्नेछन् । 

ब्राजिलका युवा फर्वार्ड डेभिड नेरेसलाई पनि थुप्रै ठूला क्लबहरूले आँखा लगाइरहेको बताइन्छ । 

सेमीफाइनलमा आयाक्सको भिडन्त टोटनहम हट्सपरसँग हुने भएको छ । टोटनहमसँग म्यानचेस्टर सिटीको जति पैसा नभए पनि प्रेमियर लीगको क्लबमध्ये ऊ पनि धनी क्लबमै गनिन्छ । 

सेमीफाइनलमा आयाक्स आउट भयो भने पनि उनीहरूले च्याम्पियन्स लीगमा देखाएको प्रदर्शन वर्र्षौंमा एकपटक मात्र देख्न पाइने हो । हुन त आयाक्सले हार्छ भनी बाजी लगाउनु मूर्खतापूर्ण हुनेछ तर उनीहरू हारे नै भने पनि

फूटबलमा पैसाको असन्तुलनले निरन्तरता पाएको भन्नुपर्ने हुन्छ । 

त्यसैले यो सीजनमा आयाक्सले शिखरनजिक पुगेर अन्तिम चरणमा असफलता पायो भने पनि ऊ फेरि क्लबलाई बलियो बनाउन थालिहाल्छ । तर उसले राम्रो खेल देखाउन्जेल हामीहरूले त्यसको आनन्द उठाउनुपर्छ । 

आरटीमा प्रकाशित विश्लेषण