बुटवल – नेकपाले सोमवार पार्टीको ७७ वटै जिल्ला नेतृत्व टुंगो लगाएको छ । नेतृत्व टुंगो लागेसँगै ५ नम्बर प्रदेशमा नेतृत्वप्रति असन्तुष्टि देखिएको छ ।

केहीले घटुवा हुनुपरेको आक्रोश व्यक्त गरेका छन् भने कोही कहीले सधै एउटै व्यक्ति नेतृत्वमा दिइएको भन्दै स्वीकार्य नभएको बताएका छन् ।

सिफारिस गरेर पठाएका नामभन्दा अरु व्यक्ति नै नेतृत्वमा आएपछि जिल्लाका नेता अचम्ममा समेत परेका छन् । रुपन्देहीका सचिव चयन भएका दधिराम न्यौपानेले आफूलाई सचिव पद स्वीकार्य नभएको बताए । उनी पूर्व माओवादीको पोलिटव्यूरो, केन्द्रीय सदस्य र रुपन्देही इन्चार्ज समेत भइसकेका हुन् । 

रुपन्देहीमा अध्यक्षको लागि गोपाल भट्टराई र नारायण जिसीको नाम सिफारिस भएको थियो । रुपन्देहीको अध्यक्षको जिम्मेवारी बुटवल उपमहानगरपालिकाका प्रमुख शिवराज सुवेदीलाई दिइएको छ । गोपाल भट्टराईले पार्टी नीतिगत निर्णय गलत गरेको बताए । उनले घुमाउरो पारामा असन्तुष्टि जनाए ।

‘पद नभएकालाई पद छैन । पदमा रहेकालाई थपेर दिइयो । पार्टीले के आधारमा छनौट ग¥यो म त अचम्ममा परे,’ उनले भने । उनी २०२५ सालदेखि पार्टीमा क्रियाशिल व्यक्ति हुन् ।

उनी पूर्व एमालेका रुपन्देही अध्यक्ष पनि थिए । नवलरासी पश्चिममा जिल्ला अध्यक्ष भविश्वर तिवारी र सचिवमा तुलसी पासीलाई दिएको छ । तिवारी पूर्व माओवादी र पासी पूर्व एमाले हुन् । 

नवलपरासीमा पनि असन्तुष्टि देखिएको छ । पूर्व एमाले सचिव र संगठन विभाग प्रमुख भएका थानप्रसाद गैरेले पार्टीले आफूखुशी निर्णय गर्दा पार्टीमा लामो समय योगदान गरेको नेताहरूलाई पछाडि धकेलिएको बताए । पार्टीले सच्चा नेताहरूको कदर नगरेको उनले बताए ।

पश्चिम नवलपरासीमा तत्कालीन माओवादी केन्द्रका अध्यक्ष घनश्याम यादव सर्वसम्मत अध्यक्ष हुनेमा अधिकांश नेकपाका कार्यकर्ता विश्वस्त थिए । यादवलाई अध्यक्ष र तत्कालीन गैरेको नाम जिल्ला सचिवमा सिफारिस गरिएको थियो । 

पाल्पामा पनि सिफारिस गरेकाभन्दा अन्य व्यक्तिहरू नै अध्यक्ष र सचिवमा आएका छन् । जिल्लाबाट राधाकृष्ण कँडेल र राजेन्द्र विश्वकर्माको नाम सिफारिस गरेर पठाएको थियो । 

तर अध्यक्षमा नारायण आचार्य र सचिवमा गिरबहादुर थापाको नाम सिफारिस भएर आएपछि नेता कार्यकर्ता आश्चर्य व्यक्त गरेका छन् । आचार्य प्रदेशसभा सदस्य पनि हुन् । पूर्व उपाध्यक्ष मोहन थापा उपाध्यक्ष थिए । उनले आफू अध्यक्ष हुन पाउनुपर्ने भन्दै यस अगाडि नै विज्ञप्ति जारी समेत गरेका बताइएको छ । 

गुल्मीमा ३३ वर्षदेखि जनप्रतिनिधि भएका व्यक्ति जिल्ला अध्यक्ष भएका छन् । मधुकृष्ण पन्त उनी २०४३ सालदेखि तत्कालीन एमालेको जनप्रतिनिधि रहँदै आएका थिए । उनी अहिले छात्रकोट गाउँपालिका प्रमुख हुन् ।

उनी भन्छन्, ‘सिफारिस गरेका व्यक्तिलाई भन्दा मलाई अध्यक्षको जिम्मेवारी दिएछ । हामी पार्टी कार्यकताहरू यसमा सन्तुष्ट हुनुपर्छ ।’ गुल्मीबाट अध्यक्षमा बालसिंह काउचा र सचिवमा बुद्धि जिसीलाई सिफारिस गरेर पठाएको थियो ।

अर्घाखाँचीको अध्यक्षमा चेतनारायण आचार्य अध्यक्ष भएका छन् । उनी पनि प्रदेशसभा सदस्य हुन् । सचिवमा सन्धीखर्क नगरपालिकाका उपप्रमुख ठाकुर विक सचिवमा चयन भएका छन् । बाँकेको अध्यक्ष इन्द्रप्रसाद खरेल अध्यक्ष पनि प्रदेशसभा सदस्य हुन् । उनी माओवादी केन्द्रको कोटाबाट अध्यक्ष चयन भएका हुन् ।