काठमाडौं – श्रीलंकामा ईस्टर पर्वको छेको पारेर गरिएका शृंखलाबद्ध विस्फोटपछि तौहीद नामक जोडिएका समूहहरूलाई श्रीलंका र भारतमा निगरानी बढाइएको छ । 

अतिवादी मुसलमानी समूह नेसनल तौहीद जमात (एनटीजे) ले शृंखलाबद्ध आक्रमण गरेको भनी श्रीलंका सरकारले बताएपछि यस्तै नाम भएका अन्य संगठन पनि निगरानीमा परेका हुन् । 

तर त्यस्ता संगठनले आइतवार भएका आक्रमणको निन्दा मात्र नगरेको भई कठोर आलोचना नै गरेका छन् । 

श्रीलंका तौहीद जमात (एसएलटीजे) ले दोषीहरूलाई सबभन्दा कठोर सजाय दिनुपर्ने जनाएको छ । उसको फेसबूक पेजमा संगठनले विस्फोटमा घाइते भएका मानिसलाई रक्तदान गर्ने अभियान नै चलाएको थियो । मुसलमान पर्सनल लमा संशोधन गर्ने एक पहललाई उक्त संगठनले घोर विरोध गरेको थियो र यसका केही सदस्यलाई विगतमा घृणा जन्माउने बयान दिएको भन्दै पक्राउ समेत गरिएको थियो । 

एसएलटीजेका पूर्व सहायक महासचिव रस्मिनले उनीलगायत बहुमत सदस्यले पार्टी फुटाएर सीलोन तौहीद जमात गठन गरे । ‘एसएलटीजेले तमिलनाडु तौहीद जमातसँग काम गरिरहेको थियो । हामीहरूलाई त्यो कुरा सहज लागेन र छुट्टिने निर्णय लियौं । इस्लाम धर्म मान्ने सम्बन्धमा पनि हामीहरूबीच केही मतभिन्नता थियो,’ उनले द हिन्दु पत्रिकालाई बताए । 

एनटीजेको एसएलटीजे वा नवगठित सीटीजेसँग कुनै सम्बन्ध नरहेको उनले बताए । तर एनटीजे प्रमुख जाहरानका विषयमा उनीहरू जानकार रहेको उनको भनाइ छ । 

‘जाहरान बाट्टिकालोआको कट्टनकुडीमा बस्थे र एउटा फेसबूक पेज चलाएर स्पष्ट रूपमा आईएसको विचारधाराको प्रचार गर्थे । हामीले श्रीलंकाली जासूसी संस्थालाई यो मान्छेको बारेमा सतर्क पनि गरेका हौं, उनीहरू खतरनाक समूह हुन्,’ रस्मिनले भने । 

तमिलनाडु तौहीद जमात (टीएनटीजे) को सम्बन्ध नेसनल तौहीद जमातसँग हुनसक्ने अनुमान चल्दा टीएनटीजेका प्रवक्ता अब्दुल रहमानले कुनै सम्पर्क रहेको कुरा अस्वीकार गरे । ‘दुई संगठनको नाममा तौहीद भयो भन्दैमा उनीहरू सम्बन्धित छन् भन्न मिल्दैन,’ उनले बताए । 

कुख्यात समूह एनटीजेले सन् २०१८ को डिसेम्बर महिनामा श्रीलंकाको मध्यभागमा रहेको मावानेलामा बौद्ध मन्दिरहरूमा आक्रमण गरेको बताइएको छ । बुद्धका मूर्तिको अनुहार भत्काउने काम यस समूहले गरेको आरोप थियो । 

द हिन्दुबाट