काठमाडौं – श्रीलंकामा आइतवार भएको आत्मघाती बम विस्फोटका विषयमा भइरहेको प्रारम्भिक अनुसन्धानले यो आक्रमण न्युजील्यान्डको क्राइस्टचर्चमा भएको हमलाको जवाफमा गरिएको देखाएको छ । 

श्रीलंकाका रक्षा राज्यमन्त्री रुवान विजेवर्दनेले मंगलवार संसदमा बताए, ‘ईस्टर सन्डेका दिन श्रीलंकामा भएका आठ आक्रमण क्राइस्टचर्चमा गरिएको मुसलमानमाथिको आक्रमणको बदला भएको अनुसन्धानमा खुलेको छ ।’

मार्च महिनाको १५ तारिखमा न्युजील्यान्डको क्राइस्टचर्चमा दुई मस्जिदमा भएको गोलीकाण्डमा ५० जनाको मृत्यु भएको थियो । आक्रमणमा उग्रदक्षिणपन्थी व्यक्ति जिम्मेवार थिए । 

यसैबीच शोकमा डुबेको श्रीलंकामा मृतकको सामूहिक अन्तिम संस्कार गरिएको छ । आक्रमणमा मर्नेको संख्या ३१० पुगेको छ । 

कोलम्बोको उत्तरमा रहेको नेगोम्बोको सेन्ट सेबास्टियन चर्चमा सामूहिक अन्तिम संस्कार गरिएको हो । त्यसअघि बिहान साढे ८ बजे मृतकको आत्माको शान्तिका लागि एक मिनेट मौनधारण गरिएको थियो । 

एजेन्सी