बुटवल- प्रदेशसभा शुरू भएको झण्डै १५ महिनापछि पहिलो पटक बल्ल सांसद चिन्तावती कुर्मी वर्मा संसदमा बोलेकी छन् । संसदमा चुइक्क नबोल्ने सांसद भन्ने शीर्षकको समाचार लोकान्तर डटकममा प्रकाशित भएपछि उनी संसदको मंगलवारको संसद बैठकको शून्य समयमा बोलेकी हुन् । 

कुर्मीले दाउराबाट खाना पकाउदा बाँकेका महिलाहरू आएको भन्दै त्यसको विकल्पमा सरकारले ध्यान दिनुपर्ने बताइन् । उनले भनिन्, ‘बाँकेमा महिलाहरूलाई समस्या समाधानतर्फ ध्यान जाओस् ।’  एक मिनेटको शून्य समयमा उनी ४० सेकेन्ड मात्र बोलिन् ।  

प्रदेशसभामा उनी बाहेक अन्य सबै सांसदहरू बोलिसकेका छन् । संसदमा बोल्न नसक्ने सांसद भनेपछि उनलाई बोल्न दबाब परेको थियो । उनी संसदको तेस्रो अधिवेशनको ३० औं बैठकमा आएर बल्ल पहिलो पटक बोलिन् । 

त्यस्तै संसदमा बाँके जिल्लाको डडुवा गाउँपालिका–२ की कुर्मी तत्कालीन एमालेबाट समानुपातिक उम्मेदवार हुन् । त्यस्तै संसदको शून्य समयमा बोल्दै सांसद अष्टभुजा पाठकले लुम्बिनी धुलोले अस्तव्यस्त भएको भन्दै त्यसतर्फ सरकारको ध्यानाकर्षण गराए । उनले भने, 'भैरहवादेखि लुम्बिनीसम्मको बाटो निर्माणाधीन छ । पर्यटकीय क्षेत्र धुलोले ढाकेको छ । दुर्घटना बढेका छन् । ठेकेदार कहाँ के गर्दै छ ? त्यसतर्फ सरकारले ध्यान दिन आवश्यक छ । धुलो नियन्त्रण हुनुपर्‍यो ।'

त्यस्तै सांसद इन्द्रप्रसाद खरेलले जनता आवास कार्यक्रमको कार्यविधि अध्यावधिक गरिनुपर्ने बताए । उनले भने, ‘अहिलेको कार्यविधिले लक्षित वर्गले नपाउने समस्यामा नपरेकाले पाउने अवस्था देखियो । त्यसकारण अहिलेको कार्यविधि अध्यावधिक गरिनुपर्छ ।’

त्यस्तै संसदको विशेष समयमा बोल्दै सांसद भगवतीदेवी भण्डारीले लुम्बिनी भ्रमण वर्ष मनाउँदै गर्दा लुम्बिनीसँग सम्बन्धित रामग्राम र तिलौराकोट पछाडि परेका भन्दै दुवै क्षेत्रको पनि प्रवर्द्धन आवश्यक भएको बताइन् ।