काठमाडौं – भारतका प्रधानमन्त्री नरेन्द्र मोदीले बलिउड अभिनेता अक्षय कुमारसँग अनौपचारिक अन्तर्वार्ताका क्रममा मनका रहस्य खोलेका छन् । 

मोदीले बाल्यकालका याददेखि लिएर रिसमाथि नियन्त्रण, पारिवारिक सम्बन्ध र जिन्दगीको दर्शनका विषयमा खुलेर कुरा गरे । राजनीतिमा आउने र प्रधानमन्त्री बन्ने सपना आफूले नदेखेको उनले बताए । 

उनले भने, ‘मैले सानो जागिर खाएको भए पनि आमाले सबैलाई सक्खर खुवाउनुहुन्थ्यो होला । त्यस्तो परिवारबाट म आएको हो । देशले मलाई यति धेरै प्रेम कसरी दियो भनी म कहिलेकाहीँ आश्चर्यमा पर्छु ।’

पढ्ने सोख र सेनामा भर्ती हुने प्रश्नमा मोदीले भने, ‘बाल्यकालमा मलाई खुबै किताब पढ्न मन लाग्थ्यो । गाउँको पुस्तकालयमा गएर किताब पढिबस्थें । अनि सेनाका जवानहरूलाई चीनसँगको युद्धका बेलामा ठूलो सत्कार गरिएको देखें । पछि म रामकृष्ण मिसनमा गएँ र नयाँ नयाँ अनुभव बटुलें । हिमालयमा पनि म घुमें । मनमा उठ्ने प्रश्नको जवाफ दिँदै कताकता पुग्दै म प्रधानमन्त्री पदमा आइपुगें ।’

रिस उठ्ने विषयमा मोदीले भने, ‘१८ देखि २२ वर्षको उमेरसम्म प्रापत प्रशिक्षणमा रिस नियन्त्रण गर्ने कुरा पनि सिकें । म कठोर छु, अनुशासित छु । म कसैलाई पनि हेपेर काम गर्दिनँ । सहयोग गर्ने हिसाबमा काम गर्छु । दबाब त छ तर म त्यसलाई विभाजन गरिदिन्छु । कहिलेकाहीँ मनभित्रको क्रोध अनुहारमा झल्किन्छ । म एकान्तमा कागज लिएर बस्थें र परिस्थितिलाई कागजमा उतार्थें र त्यो कागज च्यातेर फालिदिन्थें । तैपनि मन शान्त नभए फेरि लेख्थें । त्यसबाट म आफैं पनि थाहा पाउँथें, म पनि गलत रहेछु ।’

कठोर भएको भन्ने प्रश्नमा मोदीले आफ्नो बारेमा बनाइएको छवि ठीक नभएको बताए । उनले भने, ‘कसैले एकदमै धेरै काम गर्नुपरेको भन्छ भने त्यो साँचो हो तर म कसैलाई दबाब दिन्छ । म कामको संस्कृति विकसित गर्न खोज्दैछु र आफैं पनि काममा खटिन्छु । कसैमाथि अनुशासन थोपर्दैमा कठोर देखिइँदैन । मसँग बैठक गर्दा मानिसहरू आफैं नै मोबाइल नलिइकन आउँछन् ।’

विपक्षी दलहरूसँगको सम्बन्धमा कुरा गर्दा मोदीले आफूलाई ममता बनर्जीबाट उपहार आउने गरेको बताए । उनले भने, ‘विपक्षी दलमा मेरा थुप्रै साथी छन् । म उनीहरूसँग खाना पनि खान्छु । म गुजरातको मुख्यमन्त्री नहुँदै काम परेर संसद् गएको थिएँ र गुलाम नबी आजादसँग गफ गरिरहेको थिएँ । एक पत्रकारले मलाई राष्ट्रिय स्वयंसेवक संघको सदस्य भएर गुलाम नबीसँग कुरा गर्ने विषयमा कुरा सोधे । गुलाम नबीजीले सबै दलका मानिस परिवार जसरी जोडिएको बताए । ममता बनर्जी त मलाई वर्षको एकपटक कुर्ता छानेर पठाउँछिन् । बंगलादेशकी प्रधानमन्त्री शेख हसीनाजी मलाई ढाकाबाट मिठाई पठाउँछिन् । ममता दिदीले यो कुरा थाहा पाएपछि मलाई पनि मिठाई पठाउँछिन् ।’

फिल्म कत्तिको हेर्नुहुन्छ भन्ने प्रश्नमा उनले व्यस्तताका कारण खासै फिल्म हेर्न नपाएको बताए । गुजरातको मुख्यमन्त्री हुँदा अमिताभ बच्चनको फिल्म पा हेरेको उनको भनाइ थियो । 

एजेन्सी