काठमाडौं – एनआईसी एशिया बैंक लिमिटेडको तारकेश्वर नगरपालिका वडा–११ काठमाडौंस्थित मनमैंजु शाखाकोे उद्घाटन गरिएको छ ।

तारकेश्वर नगरपालिकाका मेयर श्रीरामेश्वर बोहरा तथा बैंकका उपप्रादेशिक कार्यालय प्रदेश नम्बर ३ का प्रमुख विकास खरेलबाट वैशाख १० गते भव्य समारोहबीच उद्घाटन भएको छ ।

शाखाको उद्घाटन समारोहमा बोल्दै मेयर बोहराले काठमाडौं उपत्यकाभित्र समेत बैंकिङ पहुँच कम भएका स्थान छानी आमसर्वसाधारणसम्म बैंकिङ पहुँच वृद्घि गर्न बैंकले खेलेको भूमिकाको प्रशंसा गरे ।

कार्यक्रममा खरेलले दुर्गम तथा ग्रामीण भेगमा समेत आफ्नो उपस्थिति सबल बनाउँदै गएको बैंकले नेपाल सरकार तथा नेपाल राष्ट्र बैंकको वित्तीय सवलीकरण अभिवृद्वि गर्ने कार्यमा महत्त्वपूर्ण योगदान पुर्याइरहेको जानकारी गराए ।

बैंकलाई आमजनमानसले गरेको प्रगाढ विश्वास, अगाध स्नेह र बैंक प्रतिको भरोसाले गर्दा मुलुकभर २८१ शाखा कार्यालय, २८९ एटीएम, ४० वटा एक्सटेन्सन काउन्टर एवं २३ वटा शाखारहित बैंकिङ ईकाईमार्फत बैंकिङ सेवा प्रदान गर्ने मुलुककै सबैभन्दा ठूलो शाखा सञ्जाल भएको बैंक हुन सफल भएको छ । करीब १५ लाख ग्राहकका साथ सञ्चालनमा रहेको बैंकमा प्रमुख वित्तीय परिसूचक अत्यन्त उत्साहप्रद रहेका छन् ।

संस्थागत सुशासन, जोखिम व्यवस्थापन र आन्तरिक नियन्त्रण प्रणालीको उत्कृष्ट अभ्यासलाई बैंकले पालना गर्दै आएको छ । बैंकले हरेक सम्भावित बजार क्षेत्रमा आफ्ना ग्राहकलाई सेवा उपलब्ध गराउने अभिप्रायले अन्य विभिन्न स्थानमा चाँडै नै थप शाखा कार्यालय सञ्चालन गर्ने योजना अगाडि सारेको छ ।