सुर्खेत- कर्णाली प्रदेशको राजधानी विरेन्द्रनगरस्थित अमर ज्योति उच्च माध्यमिक विद्यालयका प्रधानाध्यापक खगेन्द्र थापामाथि विद्यालय सञ्चालन भइरहेको बेला वडा नम्बर १२ का वडा सदस्य रामकुमार दर्लामीले हातपात गर्ने प्रयास गरेका छन् ।

दर्लामीले आफूमाथि हातपात गरेको प्रधानाध्यापक थापाले आरोप लगाएका छन् । ‘विद्यालयमा सर्टिफिकेट नभएका विद्यार्थीलाई भर्ना गर्नुपर्ने भनेर दर्लामीले दबाब दिइरहेका थिए,' थापाले भने, ‘त्यसरी सर्टिफिकेट नभएकालाई हामी कसरी भर्ना गर्न सक्छौं र ?’

प्रधानाध्यापक थापाले विद्यालयको क्षमता १२ सय विद्यार्थीको मात्र भएको बताए । ‘जम्मा १२ सय विद्यार्थीलाई हामी भर्ना गर्न सक्छौं । हाम्रो क्षमता त्यहि हो,’ उनले भने, ‘अहिले १८ सय जना विद्यार्थीले फाराम भरेका छन् । इन्ट्रान्स लिएर हामी भर्ना गर्छौं भन्दा पदको दुरुपयोग गरी ममाथि हातपात गर्ने प्रयास गरे ।’

उनले मदिरा सेवन गरेर विद्यालय हातामा आइ हातपात प्रयास गरेको प्रधानाध्यापक थापाको आरोप छ । ‘शर्माले मदिरा सेवन गरेका थिए,' उनले भने, ‘अन्य सहकर्मी नभएको भए उनी जेपनि गर्न सक्थे ।’

दर्लामीको हातपातपश्चात अहिले विद्यालय परिसरमा प्रहरी राखिएको प्रधानाध्यापक थापाको भनाइ छ । तर वडा सदस्य दर्लामीले भने प्रधानाध्यापक थापाले गलत आरोप लगाएको बताए । ‘म माछामासु मदिरा केहि पनि खान्न,' उनले भने, ‘अभिभावकलाई जे पायो त्यहि बोल्ने, जनप्रतिनिधिलाई नटेर्ने बरु उहाँको बानी छ ।’ उनले आफूले मदिरा सेवन गरेको भए मेडिकल जाँच गर्न तयार रहेको बताए । उनले विद्यालयमा उल्टै प्रधानाध्यापकको दादागिरी रहेको आरोप लगाए ।