काठमाडौं– राजश्व अनुसन्धान विभागले चालू आर्थिक वर्षमा राजश्व चुहावटका ८१ वटा कसूरमा अनुसन्धान सकेको छ ।

विभिन्न ८१ वटा कसूरमा अनुसन्धान सम्पन्न गरी २ सय ३८ व्यक्तिविरुद्ध बिगो र जरिवना स्वरूप १८ अर्ब ३२ करोड रुपैयाँको बिगो दाबी गरेको हो ।

विभागले सोमवार पत्रकार सम्मेलन गर्दै चालू आर्थिक वर्षको जेठ मसान्तसम्म २ सय ३८ जनाविरुद्ध १८ अर्ब ३२ करोडसहित ३ वर्ष कैद माग दाबी गरिएको जानकारी गराएको हो ।

यसमा सुन भन्सार चोरी पैठारीको कसूरमा ६६ किलो ४ सय ग्राम सुनसमेत बरामद गरिएको विभागले जानकारी दिएको छ ।

विदेशी विनिमय अपचलन तथा अवैध हुण्डी कारोबारमा ६४ वटा मुद्दामा संलग्न १ सय ४ जनाविरुद्ध ५ अर्ब ११ करोड बिगोसहित बिगोको तेब्बर जरिवाना र ३ वर्ष कैद माग दाबी गर्दै मुद्दा दायर गरिएको विभागका महानिर्देशक दीर्घराज मैनालीले बताए ।

यसबाट राजश्व परिचालन र विप्रेषण आय प्राप्तिमा सकारात्मक प्रभाव पर्ने उनको भनाइ थियो ।