कञ्चनपुर- कञ्चनपुरको भीमदत्तनगरमा प्रधानमन्त्री कप महिला राष्ट्रिय क्रिकेट प्रतियोगिता शुरू भएको छ ।

भीमदत्तनगरस्थित क्रिकेट मैदानमा आयोजित उद्घाटन कार्यक्रममा सुदूरपश्चिम प्रदेशका सामाजिक विकासमन्त्री कृष्णराज सुवेदीले खेलकुदको विकासका लागि प्रदेश सरकारले खेलकूद प्रशिक्षण केन्द्र सञ्चालन गर्न लागेको जानकारी दिए । 

'प्रदेश सरकारले खेलाडी कल्याण कोषको स्थापना गर्नाका साथै प्रदेश सरकारले ३० करोड रकमसमेत विनियोजन गरेको छ,' उनले भने, 'खेलकुदको विकासका निम्ति प्रदेश सरकार सदैव तयार छ ।' राष्ट्रिय खेलकूद परिषद्को सहकार्य तथा स्थानीय महाकाली स्पोर्ट सोसाइटीको व्यवस्थापनमा शुरू भएको प्रतियोगिता असार ११ गतेसम्म सञ्चालन हुनेछ ।

प्रतियोगितामा सात प्रदेश र सशस्त्र प्रहरी बलको एपीएफ गरी आठ टोली सहभागी छन् । प्रतियोगिताको पहिलो खेलमा सुदूरपश्चिम प्रदेश र गण्डकी प्रदेशबीच भइरहेको छ ।

प्रतियोगितामा उपाधि विजेताले चार लाख नगद, ट्रफीसहित पुरस्कृत हुने आयोजकले जनाएको छ । प्रतियोगितामा दोस्रो हुने टोलीले तीन लाख नगद, ट्रफी र तेस्रो हुने टोलीले दुई लाख नगदसहित पुरस्कृत हुनेछन् ।