दिनभरिको कामले थकाइ लागेपछि राति परिवारसँग बसेर भाजन गर्नुको छुट्टै आनन्द छ । तर राति खाइने डिनरका पनि केही नियम छन् ।
सही समयमा खाने, हल्काफुल्का खाने र अरू केही कुरामा ध्यान दिने गर्दा तपाईं स्वस्थ हुनुहुन्छ । तर राति ढिलो खाना खाने गर्दा एसिडिटी बढ्ने, पेट भारी हुन् र अपच हुने समस्या आइलाग्छ । 

राति आठ बजेपछि खाना नखानुस् । यसपछि खाएको खाना राम्ररी पच्दैन । निद्रा पनि बिगारिदिन्छ ढिलो खानाले । 

राति बेस्सरी मसला हालेको खानेकुरा पनि नखानुस् । यस्तो खानेकुरा खानुभयो भने कब्जियत, पेट फुल्ने, छाती पोल्ने र अपच जस्ता समस्या आइलाग्छन् । 

खाना खाने क्रममा वा खाना खाएलगत्तै पानी नपिउनुस् । यसो गर्नुभयो भने खाना पचाउन गाह्रो हुन्छ । खाना खाएको आधा घन्टापछि मात्र पानी पिउनुस् । भात खाएपछि तत्कालै पानी पिउँदा पाचनप्रणाली गडबड हुन्छ अनि निद्रा भाग्छ । 

राति हल्का भोजन गर्नुपर्छ । खाना खाएको दुई घन्टापछि मात्र सुत्नुपर्छ । हल्का हिँडडुल गरेर भोजन पचाउनु उपयुक्त हुन्छ । थाकेर निद्रा लागेको छ भने केही नखानुस् । दूध, सलाद वा कुनै हल्काफुल्का कुरा मात्र खानुस् । 
खाना खानेबित्तिकै सुत्दा अनेकथरी रोग लाग्छन् ।