काठमाडौं – सरकारले जनतालाई रेलका सपना बाँडेको भन्दै प्रतिपक्षी दलका सांसदले सरकारप्रति व्यंग्य गरेका छन् ।

सोमवार प्रतिनिधि सभाको बैठकमा विनियोजन विधेयक अन्तर्गत भौतिक पूर्वाधार तथा यातायात मन्त्रालयको शीर्षकमा सांसदले उठाएका प्रश्नको जवाफ दिएपछि मन्त्री रघुवीर महासेठसँग स्पष्टीकरण सोध्दै कांग्रेसका प्रकाश रसाइली स्नेहीले रेलको टिकट काट्न राखेको पैसामा धमिरा लागिसकेको टिप्पणी गरेका हुन् ।

‘प्रधानमन्त्रीले पोहोर साल नै रेल ल्याउँछु भन्नुभएको हो, रेलको टिकट काटौंला भनेर खल्तीमा राखेको पैसामा पनि धमिरा लागिसक्यो,’ सांसद रसाइलीले प्रश्न गरे, ‘अस्ति भर्खर चिनियाँ राजदूतले भौगोलिक विकटताका कारण नेपालमा रेल आउने कुरा त्यति सजिलो छैन भन्नुभयो । कुटनीतिक रुपमा के पहल भइरहेको छ ?’ 

मन्त्रीले रसाइलीको प्रश्नमा जवाफ नदिएपनि काठमाडौं पोखरा रेलमार्गको विस्तृत आयोजना प्रतिवेदन (डीपीआर) निर्माणका लागि असार मसान्तसम्ममा कन्सल्टेन्ट नियुक्तिको प्रक्रिया टुंगो लाग्ने बताए । 

‘प्रि–फिजिविलीटी स्टडी र डीपीआरका लागि प्रक्रिया अगाडि बढाएको छ । यही मसान्तमा डीपीआरका लागि कन्सल्टेन्ट नियुक्तिको प्रक्रिया अगाडि बढ्छ,’ मन्त्री महासेठले भने ।